بھارتی نائب صدر کو استعفیٰ دینے پر مجبور کردیا گیا؟

 جاٹ زات کے نائب بھارتی صدر جگدیپ دھنکڑ جنہیں مودی “کسان کا بیٹا “ کہہ کر پکارتے تھے، بالآخر استعفی دینے پر مجبور ہو گئے۔

نائب بھارتی صدر جگدیپ دھنکڑ کا اچانک استعفیٰ محض “طبی وجوہات” نہیں بلکہ بھارتیہ جنتا پارٹی (بی جے پی) کے اندرونی حلقوں میں جاری طاقت کی رسہ کشی کا نتیجہ معلوم ہوتا ہے۔

ایک کسان کے بیٹے سے لے کر بھارت کے دوسرے اعلیٰ ترین عہدے تک پہنچنے والے دھنکڑ نے اپنی سیاسی زندگی میں کئی پارٹیوں کا رخ کیا، جنتا دل سے کانگریس اور بالآخر بی جے پی میں آ کر نریندر مودی کی پالیسیوں کی کھلے عام حمایت کی لیکن آخری لمحے میں اُن کی وفاداری بھی اُنہیں بچا نہ سکی۔

۴- سیاسی تجزیہ نگاروں کے مطابق دھنکڑ کا استعفیٰ دراصل ایک “پاور ری شفل” کا حصہ ہے۔ اس وقت کئی اہم لیڈران اس اہم عہدے کی دوڑ میں ہیں — جس میں راجیہ سبھا کے چیئرمین کی حیثیت سے نائب صدر کی آئینی طاقت سب سے اہم ہے۔

اگر کوئی ایسا نائب صدر منتخب ہو جائے جو پارٹی لائن سے ہٹ کر سوچے، اور بی جی پی کے بل روک دے تو آنے والے برسوں میں قانون سازی کے عمل کو شدید دھچکا لگ سکتا ہے۔

جموں و کشمیر کے لیفٹیننٹ گورنر منوج سنہا، جنہوں نے پاہلگام حملے کے بعد سیکیورٹی کی ناکامی کی ذمہ داری قبول کی، اس وقت سیاسی دباؤ میں ہیں۔

وہ بی جے پی میں ایک سینئر اور آزمودہ رہنما سمجھے جاتے ہیں، اور بطور سابق ریلوے وزیر اُن کی کارکردگی شاندار رہی ہے۔

وہ اتر پردیش کے اعلیٰ ذات کے لیڈر ہیں اور یہی بات انہیں یوپی کے وزیر اعلیٰ یوگی آدتیہ ناتھ کا سیاسی حریف بھی بناتی ہے۔

وزیر اعلی یوگی نہیں چاہتے کہ سنہا یوپی کی سیاست میں واپس آئیں، ایسے میں نائب صدر کی سیٹ اُنہیں “آرام دہ مگر بااثر” مقام دے سکتی ہے لیکن کیا یہی اصل وجہ ہے کہ دھنکڑ کو سبکدوش کیا گیا؟

اب جے پی نڈا، راجناتھ سنگھ، نتیش کمار اور خود یوگی آدتیہ ناتھ جیسے بڑے نام اس سیٹ پر نظریں گاڑے بیٹھے ہیں۔

اگر سنہا کو نائب صدر بنا دیا جاتا ہے، تو یوگی سے ان کی طاقت میں برابری بلکہ برتری ممکن ہے، اس سے پارٹی کے اندرونی ڈھانچے میں بڑی تبدیلی آسکتی ہے۔

دھنکڑ کو صرف 75 سال کی عمر اور دل کی تکلیف کی بنیاد پر استعفیٰ دینے پر مجبور کیا گیا؟ تو کیا یہی اصول وزیراعظم مودی پر لاگو ہوگا، جو آئندہ سال 75 سال کے ہو جائیں گے؟ کیا بی جے پی “عمر” کو سیاسی صفائی کا آلہ بنا رہی ہے؟

یہ صرف ایک استعفیٰ نہیں بلکہ ایک خاموش سیاسی معرکہ ہے۔ نائب صدر کا عہدہ بی جے پی کے مستقبل کے سیاسی توازن کو متعین کرے گا، فی الحال بی جے پی کی سیاست اگلے کچھ ماہ غیر متوازن اور ڈانواڈول لگ رہی ہے۔