بی جے پی میں قیادت کا بحران، نائب صدر کا استعفیٰ، مودی کی مشکلات بڑھ گئیں

نائب صدر جگدیپ دھنکھر کا جاری پارلیمانی اجلاس کے دوران اچانک استعفیٰ مودی حکومت کے لیے ایک بڑا سیاسی دھچکا بن کر سامنے آیا ہے، کیونکہ وہ راجیہ سبھا (ایوان بالا) کے بھی سربراہ تھے۔

ان کے استعفیٰ نے نہ صرف پارلیمانی کارروائی کو متاثر کیا ہے بلکہ حکومت کی داخلی کمزوری کو بھی آشکار کر دیا ہے۔

بھارتی میڈیا اور سیاسی مبصرین کا کہنا ہے کہ یہ استعفیٰ دراصل "آپریشن سندور” سے جڑے حساس سوالات کو دبانے کے لیے لیا گیا، کیونکہ جگدیپ دھنکھر نے اپوزیشن کو اس آپریشن پر پارلیمان میں کھلی بحث کی یقین دہانی کرائی تھی۔

اس غیر معمولی صورتحال میں بھارتیہ جنتا پارٹی (بی جے پی) کے سینئر رہنما سبرامنیم سوامی اور راشٹریہ سوائم سیوک سنگھ (آر ایس ایس) کے سربراہ موہن بھاگوت نے بھی وزیر اعظم نریندر مودی سے مستعفی ہونے کا مطالبہ کر دیا ہے۔

یہ مطالبہ کسی اپوزیشن جماعت سے نہیں بلکہ خود حکمراں جماعت اور اس کی نظریاتی تنظیم کے اندر سے آیا ہے، جو مودی کی قیادت پر بڑھتے ہوئے عدم اعتماد کا واضح  اشارہ ہے۔

آر ایس ایس کی پالیسی ہے کہ کوئی بھی شخص 75 سال کی عمر کے بعد سرکاری عہدے پر فائز نہیں رہ سکتا، اور مودی ستمبر 2025 میں 75 برس کے ہو جائیں گے۔

یہی وجہ ہے کہ پارٹی کے اندر سے ریٹائرمنٹ کی آوازیں بھی  بلند ہو رہی ہیں اور قیادت کا بحران واضح ہوتا جا رہا ہے۔

مودی کی موجودگی پارٹی کے لیے بوجھ بنتی جا رہی ہے، اور ان کے خلاف ناراضگی میں مسلسل اضافہ ہو رہا ہے۔

دوسری جانب اپوزیشن "آپریشن سندور” اور "پہلگام انکوائری” جیسے حساس معاملات پر پارلیمان میں جواب طلب کر رہی ہے۔

اس دوران مودی کا بیرونِ ملک مجوزہ دورہ تنزانیہ اور برطانیہ مزید تنقید کی زد میں آ گیا ہے۔

اپوزیشن سوال کر رہی ہے کہ جب ملک کے اندر اتنے سنجیدہ سوالات کھڑے ہو چکے ہیں، تو وزیر اعظم ملک سے باہر دوروں پر کیوں جا رہے ہیں؟

دلچسپ طور پر، بھارتی حکومت نے جس "آپریشن سندور” کے ذریعے پاکستان میں عدم استحکام پیدا کرنے کی کوشش کی، وہ خود اب اسی نوعیت کے سیاسی بحران کا شکار ہو چکی ہےاور اب خود بھارت میں مودی حکومت کو ممکنہ  تبدیلی کا سامنا ہے۔

جے پی اور آر ایس ایس کے اندر سے اٹھنے والی بغاوت اور اپوزیشن کے سوالات ایک نئے سیاسی منظرنامے کی جانب اشارہ کر رہے ہیں  ایک ایسا منظرنامہ جہاں "وشو گرو” کا دعویٰ کرنے والے مودی آج اپنی ہی پارٹی کے لیے چیلنج بن چکے ہیں۔