کشمیر میں انسانی حقوق کی پامالی، سندھ طاس معاہدے کی معطلی اور بھارتی جارحیت بے نقاب

کشمیر میں انسانی حقوق کی پامالی، سندھ طاس معاہدے کی معطلی اور بھارتی جارحیت بے نقاب ہوگئی ہے۔

17 جولائی 2025 کو لندن برطانوی ہاؤس آف لارڈز کا اہم اجلاس ہوا جس میں بھارت اور پاکستان کے درمیان بڑھتی کشیدگی پر تفصیلی بحث کی۔

اراکین نے کشمیر میں انسانی حقوق کی خلاف ورزیوں، سندھ طاس معاہدے کی معطلی اور آبی بحران پر برطانیہ سے مؤثر سفارتی کردار ادا کرنے کا مطالبہ کیا۔

لارڈ قربان حسین نے  خطاب کے دوران کشمیر میں بھارتی مظالم، انسانی حقوق کی سنگین خلاف ورزیوں اور سندھ طاس معاہدے کی معطلی پر شدید تشویش کا اظہار کیا۔

لارڈ قربان حسین نے اپنے خطاب میں کہا مسئلہ کشمیر اقوام متحدہ کا سب سے پرانا تنازع اور پاک بھارت کشیدگی کی بنیاد ہے، مقبوضہ کشمیر دنیا کا سب سے زیادہ عسکری زدہ علاقہ ہے، مقبوضہ کشمیر میں 9 لاکھ بھارتی فوجی و نیم فوجی اہلکار تعینات ہیں۔

انہوں نے کہا کہ بھارتی فوجی اہلکاروں کو آرمڈ فورسز (اسپیشل پاورز) ایکٹ کے تحت مکمل استثنیٰ حاصل ہے، ایمنسٹی و دیگر عالمی اداروں کے مطابق بھارتی مظالم سے 1 لاکھ کشمیری قتل، ہزاروں زخمی اور لاپتہ ہو چکے ہیں، ہزاروں کشمیری بھارت اور مقبوضہ کشمیر کی جیلوں میں قید ہیں، عالمی انسانی حقوق تنظیمیں شدید تشویش میں مبتلا ہیں۔

ان کا کہنا تھا کہ بھارتی فوج غیر قانونی حراستوں، تشدد، ماورائے عدالت قتل، اجتماعی زیادتیوں، جعلی مقابلوں اور جبری گمشدگیوں جیسے سنگین جرائم میں براہِ راست ملوث ہے، مقبوضہ کشمیر میں اب تک 3,000 سے زائد اجتماعی قبریں دریافت کی جاچکی ہیں، یہ قبریں انسانی حقوق کی سنگین خلاف ورزیوں کی عکاسی کرتی ہے۔

لارڈ قربان حسین نے کہا کہ حالیہ پاک بھارت تنازع کی شدت نے کئی بین الاقوامی مبصرین کو حیران کر دیا ہے، بھارت نے سیاحوں کی ہلاکت کے بعد الزام لگا کر "آپریشن سندور” شروع کیا، پاکستان نے الزامات مسترد کر کے مشترکہ تحقیقات کی پیشکش کی، بھارت نے یکطرفہ طور پر سندھ طاس معاہدے کو معطل کیا، بھارت نے پاکستان کی خودمختاری کی سنگین خلاف ورزی کرتے ہوئے اس کی حدود میں حملے کیے۔

انہوں نے مزید کہا کہ صدر ٹرمپ کی ثالثی سے 10 مئی 2025 کو جنگ بندی ہوئی، بھارت نے سندھ طاس معاہدہ بحال نہ کرنے کا اعلان کر کے خطے کو دوبارہ کشیدگی کی طرف دھکیل دیا ہے، تنازع کے باعث دونوں جوہری طاقتوں کے درمیان کشیدگی میں مزید اضافے کا خدشہ پیدا ہو گیا ہے، بھارت کا پانی کو بطور ہتھیار استعمال کرنا خطرناک قدم ہے، برطانیہ سندھ طاس معاہدے کی بحالی میں مثبت کردار ادا کرے۔