گوگل کا انٹرن شپ پروگرام کا اعلان؛ کونسے طلباء اہل ہوں گے؟

انجینئرنگ اور کوڈنگ کے شعبے سے وابستہ طلباء کے لیے گوگل میں براہ راست داخلے اور عملی تربیت حاصل کرنے کا سنہری موقع ہے، جہاں ہر ماہ 1 لاکھ 20 ہزار روپے تک وظیفہ بھی دیا جائے گا۔

دنیا کی معروف ٹیک کمپنی گوگل نے سال 2026 کے لیے اپنا "سمر سافٹ ویئر انجینئرنگ انٹرن شپ پروگرام” شروع کر دیا ہے، جو طلباء کو عالمی سطح کے سافٹ ویئر پروجیکٹس پر کام کرنے، تجربہ حاصل کرنے اور اپنی تکنیکی مہارتیں نکھارنے کا شاندار موقع فراہم کرے گا۔

اس انٹرن شپ کے ذریعے طلباء کو نہ صرف گوگل بلکہ اس کے پارٹنر اداروں کے ساتھ حقیقی پروجیکٹس پر کام کرنے کا موقع ملے گا، بلکہ ساتھ ہی ماہانہ وظیفہ، مینٹورشپ، تکنیکی سپورٹ، اور جدید ٹیکنالوجی سے سیکھنے کا بھرپور ماحول بھی فراہم کیا جائے گا۔

ڈاکٹر اے پی جے عبدالکلام ٹیکنیکل یونیورسٹی (AKTU) لکھنؤ نے اپنے انجینئرنگ طلباء کو اس پروگرام میں شرکت کی ترغیب دی ہے۔ یونیورسٹی کے انوویشن ہب کے سربراہ پروفیسر مہیپ سنگھ نے کہا کہ گوگل نے دنیا بھر کی ٹیک کمپنیوں کے ساتھ شراکت داری کی ہے، تاکہ باصلاحیت طلباء کو بین الاقوامی سطح کے پروجیکٹس پر کام کا موقع دیا جا سکے۔

 پروفیسر مہیپ سنگھ کے مطابق ہر طالب علم کو انٹرن شپ کے دوران ماہانہ وظیفہ دیا جائے گا، جو پروجیکٹس اور ورکشاپس کی نوعیت کے مطابق مختلف ہو سکتا ہے۔

گوگل نہ صرف طلباء کو عملی کام کا تجربہ فراہم کرے گا بلکہ اپنے تجربہ کار انجینئرز کے ذریعے مکمل مینٹورشپ اور ٹیکنیکل گائیڈنس بھی دے گا تاکہ وہ مؤثر انداز میں سیکھ سکیں۔

درخواست دینے کے لیے طلباء کو گوگل کی آفیشل ویب سائٹ پر جا کر "Careers” سیکشن میں "Software Engineering Internship 2026” کے تحت درخواست دینا ہوگی۔ انٹرن شپ کا دورانیہ 10 سے 12 ہفتے ہوگا اور زیادہ تر کام ورچوئل ہو گا۔ تاہم، طلباء کو مقام کے لیے بنگلور، حیدرآباد، پونے، ممبئی یا گڑگاؤں میں سے کسی ایک کا انتخاب کرنا ہوگا۔

گوگل انٹرن شپ کے نمایاں فوائد میں عالمی مصنوعات پر براہ راست کام، تکنیکی ورکشاپس، نیٹ ورکنگ ایونٹس میں شرکت اور تجربہ کار انجینئرز کے ساتھ کام کرنے کا موقع شامل ہے۔

اس پروگرام کے لیے اہلیت کے معیار میں کمپیوٹر سائنس یا متعلقہ فیلڈ میں ڈگری، C++, Java یا Python جیسی پروگرامنگ زبانوں کا تجربہ اور یونکس/لینکس پلیٹ فارمز پر کام کرنے کی صلاحیت شامل ہے۔

گوگل کا سمر انٹرن شپ پروگرام 2026 اُن طلباء کے لیے ایک انمول موقع ہے جو عالمی سطح پر اپنی صلاحیتوں کو منوانا چاہتے ہیں اور ٹیکنالوجی کے شعبے میں کامیاب کیریئر کی بنیاد رکھنا چاہتے ہیں۔