آسٹریلیا نے بھی فلسطینی ریاست کو تسلیم کرنے کا اعلان کردیا

آسٹریلیا نے بھی فلسطینی ریاست کو تسلیم کرنے کا اعلان کردیا ہے۔

الجزیرہ کے مطابق آسٹریلیا کے وزیرِاعظم انتھونی البانیز نے پریس کانفرنس کرتے ہوئے کہا کہ آسٹریلیا ستمبر میں اقوام متحدہ کی جنرل اسمبلی میں فلسطینی ریاست کو تسلیم کرے گا تاکہ دو ریاستی حل کے لیے کوششوں میں تیزی لائی جا سکے۔

انہوں نے کہا کہ یہ تسلیم کرنا ان وعدوں پر مبنی ہوگا جو آسٹریلیا کو فلسطینی اتھارٹی سے موصول ہوئے ہیں، جن میں یہ یقین دہانی شامل ہے کہ مستقبل کی کسی بھی ریاست میں حماس کا کوئی کردار نہیں ہوگا۔

ان کا کہنا تھا کہ دو ریاستی حل مشرقِ وسطیٰ میں تشدد کے تسلسل کو توڑنے اور غزہ میں جنگ، مصائب اور بھوک کو ختم کرنے کے لیے انسانیت کی سب سے بڑی امید ہے۔

انتھونی البانیز نے کہا کہ فلسطینی ریاست کو تسلیم کرنے کے منصوبے کے لیے آسٹریلیا نے فلسطینی اتھارٹی سے تفصیلی اور اہم وعدے بطور شرائط حاصل کیے ہیں۔

آسٹریلیا کے وزیرِاعظم کا کہنا تھا کہ مقبوضہ مغربی کنارے میں حکومت کرنے والی فلسطین اتھارٹی نے اتفاق کیا ہے کہ اسرائیل کے پرامن اور محفوظ وجود کے حق کو تسلیم کرنے کی دوبارہ توثیق کی جائے گی۔

انہوں نے کہا کہ غیر مسلح ہو کر عام انتخابات کرائے جائیں گے، قیدیوں اور شہدا کے خاندانوں کو ادائیگی کے نظام کو ختم کیا جائے گا، گورننس میں وسیع اصلاحات، تعلیمی نظام میں مالی شفافیت اور بین الاقوامی نگرانی کی اجازت دی جائے گی تاکہ تشدد اور نفرت پر اکسانے سے بچا جا سکے۔

ان کا مزید کہنا تھا کہ یہ موقع ہے کہ فلسطینی عوام کو اس انداز میں حقِ خود ارادیت دیا جائے جو حماس کو الگ کر دے، اسے غیر مسلح کردے اور ہمیشہ کے لیے خطے سے باہر نکال دے۔

انہوں نے یہ بھی کہا کہ ان وعدوں کو مزید اہمیت عرب لیگ کے حالیہ بے مثال مطالبے سے ملی ہے، جس میں حماس سے کہا گیا ہے کہ وہ غزہ میں اپنی حکمرانی ختم کرے اور اپنے ہتھیار فلسطینی اتھارٹی کے حوالے کرے۔