پاکستان سمیت دنیا بھر میں بلڈ مون کا نظارہ کب کیا جاسکے گا؟ تاریخ سامنے آگئی

پاکستان سمیت دنیا کے بیشتر حصوں میں رواں سال 2025ء کا دوسرا چاند گرہن 7 ستمبر کو دیکھنے کو ملے گا، جو کہ ایک مکمل چاند گرہن ہوگا اور سرخی مائل چاند کی شکل اختیار کرجائے گا، جسے "بلڈ مون” کے نام سے جانا جاتا ہے۔

ماہرین فلکیات کے مطابق یہ ایک انتہائی منفرد اور قابلِ دید فلکی مظہر ہوگا، جو نہ صرف اپنی مکمل نوعیت کے باعث اہم ہے بلکہ اس وجہ سے بھی خاص ہے کہ دنیا کی 77 فیصد آبادی اسے براہ راست دیکھ سکے گی۔

رپورٹس کے مطابق بلڈ مون کا آغاز پاکستانی وقت کے مطابق شام 8 بج کر 28 منٹ پر ہوگا اور یہ چاند گرہن رات ایک بج کر 55 منٹ تک جاری رہے گا۔ اس دوران 82 منٹ تک مکمل چاند گرہن رہے گا، جو کہ ایک طویل اور نایاب مشاہدہ تصور کیا جا رہا ہے۔ ایسے مکمل چاند گرہن عموماً 18 ماہ میں ایک بار دیکھنے میں آتے ہیں، جب چاند زمین کے سایے میں مکمل طور پر آجاتا ہے اور سرخ رنگ اختیار کرلیتا ہے۔

بین الاقوامی ذرائع کے مطابق یہ چاند گرہن حالیہ تاریخ میں سب سے زیادہ دیکھی جانے والی فلکیاتی سرگرمیوں میں سے ایک ہوگا۔ تاہم امریکا کے بعض علاقوں میں اس کا نظارہ ممکن نہیں ہوگا۔ ایشیائی ممالک خصوصاً پاکستان، بھارت، چین اور جاپان اس نایاب منظر کے مکمل نظارے کے لیے بہترین مقامات شمار ہوں گے، جب کہ آسٹریلیا، جنوبی افریقا، یورپ اور دیگر خطوں میں بھی اسے واضح طور پر دیکھا جاسکے گا۔

یاد رہے کہ 2025ء کا پہلا چاند گرہن رواں سال 14 مارچ کو ہوا تھا، لیکن وہ پاکستان میں نظر نہیں آیا کیونکہ اس کا آغاز اور اختتام دن کے وقت ہوا۔ تاہم 7 ستمبر کا یہ دوسرا چاند گرہن نہ صرف پاکستان میں واضح طور پر دکھائی دے گا بلکہ اسے بلڈ مون کی شکل میں دیکھنا ممکن ہوگا، جو فلکیاتی مظاہر سے دلچسپی رکھنے والوں کے لیے ایک نادر موقع ہے۔