عمرہ زائرین کیلئے بڑی خوشخبری آگئی

سعودی عرب کی وزارت عمرہ و حج نے بین الاقوامی زائرین کے لیے ایک نئی ڈیجیٹل سروس متعارف کروا دی ہے۔

سعودی عرب کی وزارت عمرہ و حج نے بین الاقوامی زائرین کے لیے ایک نئی ڈیجیٹل سروس ’نُسُک عمرہ‘ متعارف کروا دی ہے، جس کے ذریعے اب دنیا بھر سے عمرہ کے خواہشمند افراد بغیر کسی رکاوٹ کے آن لائن عمرہ ویزا کے لیے درخواست دے سکیں گے۔ سعودی خبر رساں ادارے کے مطابق اس ڈیجیٹل پلیٹ فارم کا مقصد عمرہ کے سفر کو آسان، مؤثر اور زیادہ سہل بنانا ہے۔

وزارت عمرہ کے مطابق ’نُسُک عمرہ‘ کو اس انداز میں ڈیزائن کیا گیا ہے کہ یہ دنیا بھر کے مسلمانوں کے لیے مقدس سفر کو مزید قابل رسائی اور سہولت بخش بنا سکے۔ اس پلیٹ فارم کے ذریعے زائرین نہ صرف عمرہ ویزا کے لیے براہ راست درخواست دے سکتے ہیں بلکہ وہ رہائش، ٹرانسپورٹ، ثقافتی سیاحت اور دیگر امدادی خدمات کی بھی آن لائن بکنگ کر سکتے ہیں۔

سعودی پریس ایجنسی کے مطابق زائرین کو یہ اختیار حاصل ہوگا کہ وہ یا تو پہلے سے تیار کردہ انٹیگریٹیڈ پیکجز میں سے انتخاب کریں یا اپنی ضروریات کے مطابق مختلف سہولیات منتخب کرکے ذاتی پیکج تشکیل دیں۔

 ’نُسُک عمرہ‘ سروس تک رسائی اس کی سرکاری ویب سائٹ (umrah.nusuk.sa) یا موبائل ایپ کے ذریعے ممکن ہے، جبکہ یہ پلیٹ فارم متعدد ادائیگی کے آپشنز بھی فراہم کرتا ہے۔

حکام کا کہنا ہے کہ اگرچہ یہ ایک جدید ڈیجیٹل چینل ہے، تاہم اس کا مقصد منظور شدہ ٹریول ایجنٹس کی جگہ لینا نہیں بلکہ زائرین کو زیادہ لچکدار اور مؤثر متبادل فراہم کرنا ہے۔ وزارت کا کہنا ہے کہ اس اقدام کا مقصد سعودی عرب کے ویژن 2030 کے اہداف کی تکمیل ہے، جس کے تحت مملکت مذہبی سیاحت کے شعبے کو جدید خطوط پر استوار کر رہی ہے۔