غزہ کے اسپتال پر اسرائیلی حملے پر خوش نہیں ہوں، ٹرمپ

امریکی صدر ڈونلڈ ٹرمپ نے کہا ہے کہ غزہ کے اسپتال پر اسرائیلی حملے پر خوش نہیں ہوں۔

اوول آفس میں صحافیوں سے گفتگو کرتے ہوئے امریکی صدر ڈونلڈ ٹرمپ نے کہا کہ وہ اس حملے کے بارے میں نہیں جانتے، لیکن وہ اس پر خوش نہیں ہیں۔

انہوں نے کہا کہ وہ یہ سب نہیں دیکھنا چاہتے، ہمیں اس بھیانک خواب کو ختم کرنا ہوگا۔

ان کا کہنا تھا کہ غزہ پر بہت سنجیدہ سفارتی کوشش جاری ہے، نیتن یاہو کے ساتھ کافی کام ہورہا ہے، 2 سے 3 ہفتوں میں ہمارے پاس ایک اچھا حتمی انجام ہوگا۔

واضح رہے کہ اسرائیلی فوج نے غزہ کے النصر اسپتال پر یکے بعد دیگرے دو فضائی حملے کیے جس میں مریضوں، ڈاکٹروں، شہری دفاع رضاکاروں اور پانچ صحافیوں سمیت 20 افراد شہید ہوئے۔

رپورٹ میں بتایا گیا کہ غیر ملکی خبر رساں ادارے رائٹرز کا کیمرا مین حسام المصری، امریکی خبر ایجنسی اے پی اور برطانوی اخبار انڈیپینڈنٹ کی نامہ نگار مریم ابودقہ، امریکی ٹی وی این بی سی کا صحافی معاذ ابوطحٰہ، الجریزہ کا فوٹو جرنلسٹ محمد سلامہ اور قدس نیٹ ورک کا صحافی احمد ابو عزیز شہداء میں شامل ہیں۔

صحافی اسپتال میں اسرائیل کے جبری قحط کا شکار فلسطینیوں کی رپورٹنگ کر رہے تھے۔

المواصی کیمپ میں بھی اسرائیلی فائرنگ سے ایک صحافی شہید ہوا، شہید حسن زوہان فلسطینی اخبار کے لیے کام کرتا تھا۔

غزہ میں جاری اسرائیلی حملوں سے شہید صحافیوں کی تعداد 246 ہوگئی ہے۔