ٹرمپ مودی تعلقات میں کڑواہٹ کیسے آئی، امریکی اخبار نے کہانی سنادی

بھارت امریکا تعلقات میں کیسے دوریاں ہوئیں امریکی اخبار نے اندرونی کہانی بتادی۔

امریکی اخبار کے مطابق صدر ڈونلڈ ٹرمپ کی بات ماننے کے بجائے ہٹ دھرمی اختیار کرنے اور نوبیل امن انعام کے لیے انھیں نامزد کرنے سےگریز کے سبب ٹرمپ مودی تعلقات میں تناؤ بڑھا۔

امریکی اخبار نے یہ بات واشنگٹن اور نئی دہلی میں درجنوں اہم شخصیات کے انٹرویوز کی بنیاد پر کہی ہے۔

اخبار کے مطابق امریکی صدر نے 17 جون کو بھارتی وزیراعظم نریندر مودی کو ٹیلیفون کیا اور دہرایا کہ پاک بھارت فوجی کشیدگی ختم کرانے پر انھیں کس قدر فخر ہے۔

اخبار نے لکھا کہ ڈونلڈ ٹرمپ نے مودی کو بتایا کہ پاکستان نوبیل امن انعام کے لیے کے لیے نامزد کرنے والا ہے، ٹرمپ چاہتے تھے کہ مودی بھی انھیں نوبیل امن انعام کے لیے نام زد کریں۔

امریکی اخبار کی رپورٹ کے مطابق مودی نے صدر ٹرمپ کو بتایا کہ امریکی مداخلت کا جنگ بندی سے تعلق نہیں ہے، مودی کا دعویٰ تھا کہ معاملہ بھارت اور پاکستان نے براہ راست حل کیا تھا۔

 اخبار کے مطابق صدر ٹرمپ نے نریندر مودی کی بات ٹال دی مگر امریکی صدر سے اختلاف اور صدر ٹرمپ کو نوبیل امن انعام کےلیے نامزد کرنے سے متعلق بات  سے انکار نے دونوں لیڈروں کے درمیان تعلقات میں کڑواہٹ گھول دی۔

اخبار کے مطابق یہ تنازع ہی بھارت اور امریکا کے درمیان تجارتی بات چیت پر بھی اثرانداز ہوا اور اس کانتیجہ یہ نکل سکتا ہےکہ بھارت اب امریکا کے حریفوں بیجنگ اور ماسکو کے قریب ہوجائے۔