غم کی خبر؛ اسرائیل کا حماس ترجمان ابوعبیدہ کو نشانہ بنانے کا دعویٰ

اسرائیلی وزیرِ دفاع اسرائیل کٹز نے آج دعویٰ کیا ہے کہ حماس کے ترجمان ابوعبیدہ کو اسرائیلی فوج نے غزہ میں شہید کر دیا ہے۔ 

عرب میڈیا کے مطابق ابوعبیدہ حماس مسلح ونگ القسام بریگیڈ کے ترجمان ہیں۔ فلسطینی ذرائع نے آج العربیہ کو بتایا کہ ابوعبیدہ ایک اسرائیلی حملے میں شہید ہو گئے۔

ذرائع کے مطابق اسرائیل نے ایک فلیٹ کو نشانہ بنایا جس میں ابو عبیدہ موجود تھے، اور اس فضائی حملے میں اپارٹمنٹ میں موجود تمام افراد شہید ہو گئے، فلسطینی ذریعے نے مزید کہا کہ ابو عبیدہ کے اہلِ خانہ اور القسام قیادت نے لاش کی شناخت کے بعد ان کی شہادت کی تصدیق کر دی ہے۔

مصدر فلسطيني للعربية: مقتل الناطق باسم كتائب القسام أبو عبيدة بقصف إسرائيلي على شقة بغزة #قناة_العربية#أخبار_الصباح pic.twitter.com/A6Fxz9b3SH

— العربية (@AlArabiya) August 31, 2025

اسرائیلی میڈیا کے مطابق اس کارروائی کا ہدف القسام بریگیڈز کے ترجمان ابو عبیدہ تھے اور ان کے مطابق 95 فی صد امکان ہے کہ یہ کارروائی کامیاب رہی۔ اسرائیلی چینل 12 نے بتایا ہے کہ ابو عبیدہ کی موجودگی کی ابتدائی معلومات جمعے کی شام ملی تھیں اور ہفتہ کی شام ساڑھے پانچ بجے یہ کارروائی انجام دی گئی۔

واضح رہے کہ اسرائیل نے اس سے قبل جمعرات کو صنعا میں فضائی حملے میں قبل یمن کے حوثی وزیر اعظم احمد الرحاوی کو بھی نشانہ بنا کر شہید کر دیا ہے، جس پر یمن کے حوثی باغیوں نے اسرائیل سے انتقام لینے کا عہد کیا ہے۔

اسرائیل کی جانب سے غزہ پر حملوں کا سلسلہ جاری ہے، گزشتہ چوبیس گھنٹوں میں مزید 70 سے زائد فلسطینی شہید کر دیے گئے ہیں، جب کہ غذائی قلت سے 10 فلسطینی زندگی کی بازی ہار گئے ہیں۔

یاد رہے کہ اسرائیلی فوج کے ترجمان نے ہفتے کو اعلان کیا تھا کہ اس نے غزہ میں حماس کی ایک نمایاں شخصیت کو نشانہ بنایا ہے، اسرائیلی فوج کے ترجمان نے’ایکس‘ پلیٹ فارم پر لکھا تھا کہ غزہ شہر کے شمالی حصے میں حماس کے ایک ’مرکزی رکن‘ پر فضائی حملہ کیا گیا ہے۔

تاہم فلسطینی مزاحمتی تنظیم حماس کی جانب سے ابوعبیدہ کی شہادت کی تصدیق نہیں کی گئی ہے۔