7 سالہ گمشدگی ڈرامہ نکلی؛ پہلی بیوی نے شوہر کو انسٹا پر دوسری بیوی کے ساتھ پکڑ لیا

بھارت کی ریاست اتر پردیش کے ضلع ہردوئی میں ایک حیران کن واقعہ سامنے آیا ہے جس نے سوشل میڈیا پر بھی ہلچل مچا دی۔

بھارتی میڈیا کے مطابق جتیندر کمار نامی شخص، جو شادی کے کچھ ہی عرصے بعد پراسرار طور پر لاپتا ہوگیا تھا، برسوں بعد انسٹاگرام کی ایک ریل میں دوسری خاتون کے ساتھ نظر آیا۔

جتیندر نے 2017 میں مران نگر کی شیلو نامی خاتون سے شادی کی، بیٹے کی پیدائش بھی ہوئی لیکن شادی شدہ زندگی زیادہ عرصہ خوشگوار نہ رہی۔

جتیندر اور اس کے گھر والے شیلو پر جہیز کے لیے دباؤ ڈالتے رہے اور قیمتی زیورات سمیت سامان کا تقاضہ کرتے رہے۔

اسی دوران 2018 میں اچانک جتیندر غائب ہوگیا، جس کی ایف آئی آر بھی درج ہوئی مگر کوئی سراغ نہ ملا۔

لاپتا ہونے کے بعد جتیندر کے اہلخانہ نے الٹا شیلو کے خاندان پر اس کے قتل کا الزام لگا دیا، شیلو بیٹے سمیت والدین کے گھر پر رہنے لگی، لیکن حال ہی میں ایک انسٹا ریل نے معاملے کو نیا موڑ دیا۔

شیلو نے سوشل میڈیا پر براؤز کرتے ہوئے ایک ویڈیو دیکھی جس میں جتیندر کسی دوسری عورت کے ساتھ لدھیانہ میں انجوائے کرتا دکھائی دیا۔

شیلو کا کہنا ہے کہ شوہر نے خفیہ طور پر دوسری شادی کرلی تھی اور اس کے اہلخانہ کو بھی سب پتا تھا مگر وہ خاموش رہے۔

پولیس کے مطابق جتیندر کے لاپتا ہونے کے بعد مقدمہ پہلے ہی درج تھا، اب شیلو نے نئے شواہد کے ساتھ درخواست دے دی ہے جس پر مزید تحقیقات جاری ہیں۔