بھارتی آبی جارحیت کا منصوبہ بے نقاب؛ بھارتی جنرل کا ویڈیو بیان وائرل

بھارتی فوج کے ایک سابق لیفٹیننٹ جنرل کنول جیت سنگھ نے اعتراف کیا ہے کہ بھارت پاکستان کو نقصان پہنچانے کے لیے پانی کو بطور ہتھیار استعمال کر سکتا ہے۔

یہ بیان ایک انٹرویو کے دوران سامنے آیا جسے سینئر صحافی حامد میر نے سوشل میڈیا پلیٹ فارم ایکس (سابقہ ٹوئٹر) پر شیئر کیا۔

This retired Indian General Kanwaljeet Singh Dhiloon is dreaming to destroy Pakistan by using water as a weapon. Just look at his mentality. Intellectually dishonest and corrupt. He is trying to please RSS because he need another govt job next year. Bloody job seeker. pic.twitter.com/A3unMYznh1

— Hamid Mir حامد میر (@HamidMirPAK) September 1, 2025

کلپ میں جنرل (ر) کنول جیت سنگھ یہ کہتے نظر آتے ہیں کہ بھارت کے پاس یہ مکمل صلاحیت موجود ہے کہ وہ دریا کا پانی جب چاہے روک یا جاری کر سکتا ہے۔

انہوں نے دعویٰ کیا کہ اگر بھارت اچانک پاکستان کی جانب بڑی مقدار میں پانی چھوڑ دے تو وہ تباہ کن سیلاب کا سبب بن سکتا ہے جس سے پاکستان کو سنبھلنے کا موقع نہیں ملے گا اور مزید یہ کہ وہ کاشتکاری کے اہم موسم میں پانی روکنے اور برسات کے وقت اسے چھوڑنے کی حکمت عملی اختیار کر کے پاکستان کی زراعت اور معیشت کو شدید نقصان پہنچا سکتا ہے۔

جنرل (ر) کنول جیت سنگھ کا کہنا تھا کہ سندھ طاس معاہدہ ایک عالمی معاہدہ نہیں بلکہ صرف بھارت اور پاکستان کے درمیان دوطرفہ معاہدہ ہے لہٰذا بھارت اپنی صوابدید پر پانی کے بہاؤ کو کنٹرول کر سکتا ہے۔

یہ انکشاف ایسے وقت پر سامنے آیا ہے جب حالیہ دنوں میں بھارت کی جانب سے دریائے راوی، چناب، ستلج اور جہلم میں اچانک بڑی مقدار میں پانی چھوڑا گیا جس کے نتیجے میں پاکستان کے کئی علاقوں میں شدید سیلاب آیا، درجنوں افراد جاں بحق ہوئے، زرعی زمینیں تباہ ہوئیں اور ہزاروں خاندان متاثر ہوئے۔