چین میں ویزا فری انٹری سے متعلق انتہائی اہم خبر آگئی

چین نے روسی شہریوں کو آزمائشی بنیادوں پر ویزا فری انٹری دینے کا فیصلہ کیا ہے، جس کا اطلاق 15 ستمبر سے ہوگا۔

چینی وزارتِ خارجہ کے مطابق یہ سہولت ایک سال کے لیے عام پاسپورٹ رکھنے والے روسی شہریوں کو حاصل ہوگی، جس کے تحت وہ زیادہ سے زیادہ 30 دن تک چین میں قیام کر سکیں گے۔

اس اقدام کا مقصد چین میں سیاحت اور باہمی روابط کو فروغ دینا ہے۔ اس سے قبل بھی چین نے سیاحت کے فروغ کی غرض سے 70 سے زائد ممالک کے شہریوں کو ویزا فری انٹری کی سہولت فراہم کی تھی، جس کے مثبت اثرات دیکھنے میں آئے ہیں۔

نئی پالیسی کے تحت مجموعی طور پر 74 ممالک کے شہری بغیر ویزا چین کا سفر کر سکتے ہیں اور 30 دن تک قیام کر سکتے ہیں۔ نیشنل امیگریشن ایڈمنسٹریشن کے مطابق رواں سال 2024 کے دوران 2 کروڑ سے زائد غیر ملکی سیاح چین میں بغیر ویزا داخل ہو چکے ہیں۔

حکام کا کہنا ہے کہ چین کی ویزا پالیسی میں نرمی کا مقصد نہ صرف سیاحت کو فروغ دینا ہے بلکہ عالمی سطح پر اپنی معیشت اور سافٹ پاور کو بھی مضبوط بنانا ہے۔ چینی ٹریول کمپنیاں اور ٹور گائیڈز اب موسم گرما کی تعطیلات کے دوران سیاحوں کی بڑی تعداد کی آمد کے لیے تیاریاں کر رہے ہیں۔

واضح رہے کہ دسمبر 2023 میں چین نے فرانس، جرمنی، اٹلی، اسپین، ہالینڈ اور ملائیشیا کے شہریوں کو بھی ویزا فری انٹری کی سہولت دی تھی، جس کے بعد بیشتر یورپی ممالک اس پالیسی کا حصہ بن چکے ہیں۔