چین کی عظیم جنگی کامیابی کی 80 ویں سالگرہ، صدر شی جن پنگ کا عالمی امن کے عزم کا اعادہ

چین میں دوسری جنگ عظیم کے دوران جاپانی جارحیت کے خلاف چینی عوام کی مزاحمتی جنگ میں فتح کی 80 ویں سالگرہ کے موقع پر بیجنگ میں پروقار تقریب منعقد کی گئی۔

تقریب کا آغاز چینی صدر شی جن پنگ کی آمد سے ہوا، جنہوں نے عالمی رہنماؤں کو خوش آمدید کہا اور وزیراعظم شہباز شریف کا پرتپاک استقبال کیا۔

کمیونسٹ پارٹی آف چائنا کے جنرل سیکریٹری، صدرِ مملکت اور سینٹرل ملٹری کمیشن کے چیئرمین شی جن پنگ نے تقریب میں شرکت کی اور چانگ آن ایونیو پر فوجی دستوں کا معائنہ کیا۔

اس موقع پر 45 سے زائد فارمیشنز اور یونٹس نے صدرِ مملکت کو سلامی دی اور بھرپور تیاری کے ساتھ پریڈ میں شریک ہوئے۔

پریڈ میں چین کے جدید ٹینکوں اور بکتر بند گاڑیوں کا مارچ پاسٹ ہوا، ہائپر سونک میزائلوں سمیت جدید اسلحہ کی نمائش کی گئی، جبکہ فوجی دھنوں کے ساتھ قومی ترانہ بیجنگ کی فضاؤں میں گونج اٹھا۔

چین کے قومی پرچم بردار ہیلی کاپٹرز اور جدید لڑاکا طیاروں نے صدر شی جن پنگ کو سلامی دی۔

صدر شی جن پنگ تیان آن من اسٹیج کے مرکزی مقام پر پہنچے اور قوم سے اہم خطاب میں جنگی ہیروز کو خراجِ تحسین پیش کرتے ہوئے عالمی امن و ترقی کے عزم کو دہرایا۔

اپنے خطاب میں انہوں نے کہا کہ چینی قوم نے عظیم قربانیاں دے کر فتح حاصل کی اور اب یہ ہماری ذمہ داری ہے کہ تاریخ سے سبق سیکھتے ہوئے امن کے تحفظ کے لیے کام کریں۔

ان کا کہنا تھا کہ چینی عوام امن کے لیے پُرعزم ہیں، چین جتنا بھی مضبوط ہوجائے توسیع پسندانہ عزائم نہیں رکھے گا۔

تقریب کے دوران 80 توپوں کی سلامی دی گئی، جو اس تاریخی فتح کی 80 ویں سالگرہ کی علامت تھی۔

پریڈ میں وزیراعظم شہباز شریف سمیت 26 عالمی رہنماؤں نے شرکت کی، روسی صدر ولادیمیر پیوٹن اور شمالی کوریا کے رہنما کم جونگ اُن اس تقریب کے مہمانِ خصوصی تھے۔

اس تقریب میں بھارت کے وزیراعظم نریندر مودی کو شرکت کی دعوت ہی نہیں دی گئی تھی۔