امریکا کے پاس دنیا کی طاقتور ترین فوج ہے، ٹرمپ

امریکی صدر ڈونلڈ ٹرمپ نے کہا ہے کہ امریکا کے پاس دنیا کی طاقتور ترین فوج ہے۔

امریکی محکمہ دفاع کے نام کی تبدیلی کی تقریب میں ڈونلڈ ٹرمپ نے گفتگو کرتے ہوئے کہا کہ یوکرین کے مسئلے میں کافی رکاوٹ ہے، یوکرین سے متعلق سیکیورٹی معاہدہ زیرِ غور ہے۔

انہوں نے کہا کہ امریکا یوکرین کیلئے مزید اقدامات کررہا ہے، یوکرین کی سیکیورٹی  سے متعلق ہم متحرک ہیں، روس یوکرین جنگ رکوانا تھوڑا مشکل کام ہے، یوکرین جنگ میں روزانہ 7 ہزار افراد ہلاک ہورہے ہیں۔

ان کا کہنا تھا کہ ہم نے دنیا میں 7 جنگیں رکوائی ہیں، یہ جنگیں تجارت اور طاقت کے زور پر روکیں۔

ڈونلڈ ٹرمپ نے کہا کہ ایسے اقدامات پر غور کررہے ہیں کانگریس کے پاس نہ جانا پڑے، محکمہ دفاع کے نام کی تبدیلی کی منظوری کیلئے کانگریس سے باہر کوئی طریقہ اختیار کرینگے۔

امریکی صدر کا کہنا تھا کہ ہم نے جنگ عظیم اول اور دوئم جیتیں، امریکا دنیا کی طاقتور ترین فوج ہے، امریکا کا سازو سامان افغانستان میں برباد ہورہا ہے، وقت آگیا چیزوں کو ان کے اصل نام سے پکارا جائے۔

انہوں نے کہا کہ بھارت کی جانب سے روسی تیل خریدنا مایوس کن ہے، بھارت کے مسلسل روسی تیل خریدنے پر ٹیرف دوگنا کردیا، ہم نے بھارت پر 50 فیصد سخت ٹیرف عائد کیا ہے، بھارت نے ہمیں مایوس کیا ہے۔

ان کا کہنا تھا کہ وینزویلا سے منشیات اسمگلنگ کی اجازت نہیں دیں گے،11 ہزار سے زائد لوگ منشیات کے باعث ہلاک ہوئے، اب منشیات کے عادی افراد کی تعداد لاکھوں میں ہے، امریکا وینز ویلا میں رجیم چینچ نہیں چاہتا۔

ڈونلڈ ٹرمپ نے کہا کہ ہم حماس سے سنجیدہ بات چیت کررہے ہیں، اسرائیلی یرغمالیوں کو رہا نہ کیا گیا تو سخت اقدامات کیے جائینگے، اب تمام یرغمالیوں کو ایک ہی بار رہا کرنا پڑے گا۔

امریکی صدر کا مزید کہنا تھا کہ حماس کے پاس اسرائیل کے 20 یرغمالی موجود ہیں، غزہ میں 30 سے زائد یر غمالیوں کی لاشیں پڑی ہیں، امریکی سیکیورٹی پر حملہ برداشت نہیں کیا جائے گا۔