امریکی ریاست جارجیا میں ہنڈائی پلانٹ میں موجود تارکین وطن کے خلاف آپریشن مکمل

امریکی ریاست جارجیا میں ہنڈائی کمپنی میں تارکین وطن کے خلاف امریکی امیگریشن ادارے کا ایک ماہ جاری آپریشن مکمل ہوگیا۔

امریکی نشریاتی ادارے سی این این کی رپورٹ کے مطابق امریکی ریاست جارجیا کے جنوب مشرقی علاقے میں موجود اس پلانٹ پر کیا جانے والا یہ آپریشن امریکی تاریخ کا طویل ترین آپریشن تھا۔

فوجی اہل کاروں نے پلانٹ آنے اور جانے کے تمام راستے مسدود کیے رکھے، سی این این کی رپورٹ کے مطابق امریکا میں امیگریشن حکام کی جانب سے ہنڈائی موٹر ایل جی بیٹری فیکٹری پر چھاپہ مارا گیا جس میں 475 افراد کو گرفتار کرلیا گیا۔

غیرملکی میڈیا رپورٹس کے مطابق امریکی ریاست جارجیا میں چھاپے کے دوران 300 سے زائد جنوبی کوریائی شہری زیرحراست میں لیے گئے، امیگریشن حکام نے بتایا کہ چھاپا ٹرمپ کی امیگریشن کریک ڈاؤن پالیسی کا حصہ ہے۔

خبرایجنسی نے بتایا کہ جنوبی کوریا کے صدر لی جے میونگ نے جنوبی کوریا کے شہریوں کی گرفتاری پر ردعمل کا حکم دیا ہے، صدر لی نے گرفتار شہریوں کے تحفظ اور حقوق یقینی بنانے کی ہدایت کی ہے۔

جنوبی کوریا کے وزیرخارجہ نے کہا کہ معاملہ حل کرنے کیلئے فوری اقدامات کیے جائیں گے، کوریائی شہریوں اور کمپنیوں کے مفادات متاثر نہیں ہونے دیں گے۔

وزیرخارجہ جنوبی کوریا نے گرفتاری پر مزید ردعمل دیتے ہوئے کہا کہ ممکن ہے واشنگٹن جاکر امریکی حکام سے براہ راست بات کروں۔

خبرایجنسی نے بتایا کہ امریکی صدر ڈونلڈ ٹرمپ نے گرفتار جنوبی کوریائی ورکرز کو غیرقانونی تارکین وطن قرار دیا ہے۔

خیال رہے کہ اس وقت جنوبی کوریا ایشیا کی چوتھی بڑی معیشت ہے جو کہ امریکا میں بڑے پیمانے پر سرمایہ کاری کررہا ہے۔