بھارت کی پاکستان کو جنگ کا دائرہ مشرقی پاکستان تک بڑھانے کی دھمکی

اسلام آباد: بھارت کی جانب سے جنگ کا دائرہ مشرقی پاکستان تک بڑھانے کی دھمکی سامنے آگئی ہے۔

بھارتی ترجمان نے اعتراف کیا ہے کہ بھارتی افواج کو لاہور، سلیمانکی اور فیروز پور کے محاذوں پر بھاری نقصان اٹھانا پڑا اور حملے ناکام بنادیے گئے۔

7 ستمبر کو پاک فضائیہ نے شاندار کارکردگی کا مظاہرہ کرتے ہوئے 31 بھارتی طیارے تباہ کیے، جس کے بعد اب تک بھارتی فضائیہ کے کل 53 جہاز مار گرائے جا چکے ہیں۔ صدر ایوب خان نے پاک فضائیہ کی شاندار کارکردگی پر خراجِ تحسین پیش کرتے ہوئے کہا کہ "صرف استصوابِ رائے ہی کشمیر میں امن لا سکتا ہے۔”

ترجمان کشمیر انقلابی کونسل نے بھارت کو خبردار کیا کہ "کشمیری بھارتی عزائم کو خاک میں ملا دیں گے۔”

ادھر پاک فوج کے کمانڈر ان چیف جنرل موسیٰ نے حال ہی میں ریٹائر ہونے والے افسران اور جوانوں کو بھی ڈیوٹی پر واپس حاضر ہونے کا حکم دیا۔ گورنر پنجاب ملک امیر محمد خان نے کہا کہ "فتح ہمارا مقدر ہے”، جبکہ گورنر مشرقی پاکستان عبدالمنعم خان نے خبردار کیا کہ "مشرقی پاکستان میں جارحیت پر بھارت کو بدترین نتائج بھگتنا ہوں گے۔”

پاک بحریہ کے چیف ایڈمرل اے آر خان نے بھی پیغام جاری کرتے ہوئے کہا کہ "قوم کی توقعات پر پورا اتریں۔” پاک بحریہ کے جہاز بابر، خیبر، بدر، جہانگیر، عالمگیر، شاہ جہاں اور ٹیپو سلطان کو 7 ستمبر شام 6 بجے دوارکے کے قریب مقررہ پوزیشن پر پہنچنے کا حکم دیا گیا۔

میجر جنرل اختر حسین کو کشمیر کے جوڑیاں سیکٹر میں شاندار بہادری دکھانے پر ہلالِ جرأت سے نوازا گیا۔

صدر ایوب خان نے اقوامِ متحدہ کے سیکرٹری جنرل یو تھانٹ سے مطالبہ کیا کہ کشمیری عوام سے کیے گئے وعدے پورے کیے جائیں۔ اسی دوران پاکستان نے سکھ برادری کو یقین دہانی کرائی ہے کہ ان کے مقدس مقامات کی حرمت ہر صورت برقرار رکھی جائے گی۔