مسلمانوں کو اسرائیل سے ہر قسم کے تعلقات ختم کرنا ہوں گے: ایرانی سپریم لیڈر

ایران کے سپریم لیڈر آیت اللہ علی خامنہ ای نے کہا ہے کہ مسلمانوں کو اسرائیل سے ہر قسم کے تعلقات ختم کرنا ہوں گے۔

رپورٹ کے مطابق ایرانی سپریم لیڈر آیت اللہ خامنہ ای نے گزشتہ روز تہران میں ایرانی صدر مسعود پزشکیان اور ان کی کابینہ کے وزرا کے ساتھ ملاقات کی۔

اس موقع پر انہوں نے کہا کہ عالمی ممالک، خاص طور پر مسلم ممالک کو غزہ میں اسرائیلی رژیم کے "تباہ کن جرائم” کا مقابلہ کرنے کے لیے اس کے ساتھ تمام تجارتی اور سیاسی تعلقات منقطع کر دینے چاہئیں۔

ان کا کہنا تھا کہ صیہونی فوج بغیر کسی شرم کے متعدد جرائم اور حیران کن تباہ کاریاں کر رہی ہے۔

آیت اللہ خامنہ ای نے کہا کہ اگرچہ یہ جرائم امریکا جیسے طاقتور ملک کی حمایت سے کیے جا رہے ہیں، لیکن اس صورتحال کا مقابلہ کرنے کا راستہ بند نہیں ہے۔

ایرانی صدر کا کہنا تھا کہ احتجاج کرنے والے ممالک، بالخصوص مسلم ممالک کو اسرائیل کے ساتھ اپنے تجارتی اور حتیٰ کہ سیاسی تعلقات مکمل طور پر منقطع کر کے اسے تنہا کر دینا چاہیے۔

انہوں نے اسرائیل کو دنیا کا "سب سے زیادہ تنہا اور نفرت شدہ” رژیم قرار دیا اور کہا کہ ایران کی سفارت کاری کی ایک اہم سمت دیگر ممالک کو اس مجرمانہ فوج کے ساتھ سیاسی اور تجارتی تعلقات منقطع کرنے پر زور دینا ہونا چاہیے۔

ان کا کہنا تھا کہ ایران کی حکومت قومی طاقت اور وقار کے اجزا کو مضبوط کرنے کی پابند ہے، ان اجزا میں سب سے اہم قوم کا جذبہ، حوصلہ، اتحاد اور امید ہیں، جنہیں الفاظ اور عمل دونوں سے پیدا اور تقویت دینی چاہیے۔

آیت اللہ خامنہ ای نے انتظامیہ پر زور دیا کہ وہ ایرانی عوام کی معیشت اور زندگی کے حالات کو بہتر بنانے کو ترجیح دیں۔