23 ستمبر کو عام تعطیل کا اعلان؛ نوٹیفکیشن جاری

سعودی عرب میں 23 ستمبر کو قومی دن کے موقع پر ملک بھر میں عام تعطیل کا اعلان کر دیا گیا ہے۔

 عرب میڈیا کے مطابق مملکت سعودی عرب اپنا 95 واں قومی دن بھرپور ملی جوش و جذبے کے ساتھ منائے گی، جس کے لیے شہریوں اور غیر ملکیوں کے لیے چھٹی کا اعلان کیا گیا ہے۔

قومی دن پہلی مرتبہ 1965ء میں شاہ فیصل کے دور میں منایا گیا تھا، جب کہ 2005ء میں شاہ عبداللہ نے شاہی فرمان جاری کر کے اسے مستقل سرکاری تعطیل کا درجہ دے دیا۔ یہ دن 1932ء کی اُس تاریخی یاد کو تازہ کرتا ہے جب شاہ عبدالعزیز نے نجد اور حجاز کو متحد کر کے مملکتِ سعودی عرب کے قیام کا اعلان کیا تھا۔

اس سال قومی دن کو ’’ہمارا فخر ہماری فطرت میں ہے‘‘ کے عنوان سے منسوب کیا گیا ہے، جو سعودی عوام کی ثقافتی روایات اور قدرتی ورثے کی عکاسی کرتا ہے۔ قومی دن کے موقع پر مملکت بھر میں آتش بازی، ڈرون شوز، سعودی ہاکس کے فضائی مظاہرے، ثقافتی پروگرام، روایتی رقص اور نمائشوں کا انعقاد کیا جائے گا۔

جدہ، ریاض، دمام اور دیگر بڑے شہروں میں خصوصی تقریبات منعقد ہوں گی، جبکہ اہم سرکاری و نجی عمارتوں کو سبز روشنیوں سے منور کیا جائے گا۔ سعودی عرب میں یہ دن ہر سال 23 ستمبر کو قومی جذبے کے ساتھ منایا جاتا ہے۔