قطرپر اسرائیلی حملے کے بعد سعودی ولی عہد نے دبنگ اعلان کردیا

سعودی ولی عہد محمد بن سلمان نے قطر میں حالیہ اسرائیلی حملوں کو وحشیانہ جارحیت قرار دیتے ہوئے اس کی سخت الفاظ میں مذمت کی ہے۔

شوریٰ کونسل کے سالانہ اجلاس سے خطاب کرتے ہوئے انہوں نے کہا کہ موجودہ حالات میں عرب، اسلامی اور عالمی سطح پر فوری اور مؤثر اقدامات کی ضرورت ہے تاکہ قابض طاقت کے مجرمانہ عزائم کو روکا جا سکے۔

محمد بن سلمان نے واضح الفاظ میں کہا کہ سعودی عرب قطر کے ساتھ کھڑا ہے اور ہر ممکن تعاون فراہم کرے گا۔ انہوں نے فلسطینی عوام پر جاری مظالم اور فاقہ کشی کی شدید مذمت کرتے ہوئے کہا کہ غزہ فلسطینی سرزمین ہے اور اس پر عوام کے حقوق کو کسی صورت چھینا نہیں جا سکتا۔

دوسری جانب اسلامی تعاون تنظیم (او آئی سی) نے بھی دوحا پر اسرائیلی حملے کی شدید مذمت کرتے ہوئے اسے بین الاقوامی قوانین اور اقوام متحدہ کے چارٹر کی کھلی خلاف ورزی قرار دیا ہے۔ او آئی سی کے اعلامیے میں کہا گیا ہے کہ اسرائیلی جارحیت نہ صرف قطر کی خودمختاری کے خلاف ہے بلکہ پورے خطے کے امن و استحکام کے لیے خطرناک ہے۔

او آئی سی نے قطر کی سلامتی اور خودمختاری کے ساتھ مکمل یکجہتی کا اظہار کرتے ہوئے دوحا کے شہریوں کے تحفظ کے لیے ہر ممکن اقدام کی حمایت کا اعلان کیا۔ تنظیم نے عالمی برادری سے مطالبہ کیا کہ وہ اسرائیل کے خلاف مؤثر اقدامات کرے اور اقوام متحدہ کی سلامتی کونسل اسرائیل کو بین الاقوامی قوانین کا پابند بنائے۔