اسرائیلی حملے میں شہدا کی نمازِ جنازہ ادا، امیرِ قطر کی خصوصی شرکت

قطرکے دارالحکومت دوحہ میں اسرائیلی حملے میں شہید حماس کے افراد کی نماز جنازہ ادا کردی گئی۔

خبر رساں ایجنسی کے مطابق نمازِ جنازہ دوحہ کی مرکزی جامع مسجد مں ادا کی گئی جس میں امیرِ قطر سمیت اعلیٰ حکومتی شخصیات، متاثرہ خاندانوں کے افراد اور بڑی تعداد میں شہریوں نے شرکت کی۔

شرکاء نے شہداء کے درجات کی بلندی کے لیے دعا کی اور نم آنکھوں کے ساتھ شہدا کو سپرد خاک کیا۔ اس موقع پر رقت آمیز مناظر دیکھے گئے ہر دل دکھی اور ہر آنکھ اشکبار تھی۔

نماز جنازہ کے بعد شہریوں نے اسرائیلی جارحیت کے خلاف شدید نعرے بازی کی اور غزہ کے مظلوموں کے ساتھ اظہار یکجہتی کیا۔

قطری حکومت کی جانب سے متاثرہ خاندانوں کو مالی امداد اور ہر ممکن تعاون فراہم کرنے کا اعلان بھی کیا گیا ہے۔

شہید ہونے والوں میں حماس کے اعلیٰ ترین رہنما الخلیل الحیا کے بیٹے ھمام، الخلیل الحیا کے دفتر کے انچارج جہاد لبد اور 3 باڈی گارڈز عبد اللہ عبدالواحد، مومن حسنون، اور احمد المملوک شامل ہیں۔

شہید ہونے والوں میں قطری سیکیورٹی ادارے کے ایک اہلکارسعد محمد الحمیدی بھی شامل ہیں جنھیں قطری پرچم میں دفن کیا گیا جب کہ بقیہ کو فلسطینی پرچم کے ساتھ سپردخاک کیا گیا۔

یاد رہے کہ اسرائیلی فوج نے دوحہ میں ایک عمارت کو اُس قت نشانہ بنایا تھا جب وہاں حماس کی اعلیٰ قیادت غزہ جنگ بندی پر امریکی تجویز پر مشاورت کر رہے تھے۔