اسرائیل ہٹ دھرمی سے باز نہ آیا؛ نیتن یاہو کی پاکستان اور قطر کو دھمکی

WebDesk

11 ستمبر, 2025 16:03

اسرائیل ہٹ دھرمی سے باز نہ آیا؛ نیتن یاہو کی پاکستان اور قطر کو دھمکی

نیتن یاہو جنگ بندی مذاکرات کو سبوتاژ کرنے لگے، اسرائیلی میڈیا کی تصدیق

اسرائیلی وزیر اعظم نیتن ہاہو نے نائن الیون حملوں کے 24 برس مکمل ہونے پر بیان دیا جس میں پاکستان سمیت قطر کو دھمکی دی ہے۔

سوشل میڈیا پر گذشتہ کچھ گھنٹوں سے اسرائیلی وزیراعظم نیتن یاہو کا دو منٹ پر محیط ویڈیو پیغام زیر بحث ہے جو انھوں نے امریکہ میں نائن الیون حملوں کے 24 برس مکمل ہونے کی مناسبت سے دیا اور اُسی کے تناظر میں انھوں میں قطر میں کیے گئے اسرائیلی حملے کا جواز پیش کیا۔

لگ بھگ دو منٹ پر محیط اپنے اس بیان میں نیتن یاہو نے پاکستان اور اسامہ بن لادن کا حوالہ دیتے ہوئے کہا کہ امریکہ نے بھی القاعدہ کا تعاقب کرتے ہوئے اسامہ بن لادن کو پاکستان میں ہلاک کیا تھا۔

اس موقع پر انہوں نے قطر سمیت دیگر ممالک کو خبردار کیا کہ وہ شدت پسندوں کو پناہ نہ دیں ورنہ اسرائیل بیرون ممالک میں ایسے حملے جاری رکھے گا۔

اسرائیل نے اپنے جرم کو جواز فراہم کرنے کی مایوس کن کوشش ہے: قطر

دوسری جانب قطر کی وزارتِ خارجہ نے اسرائیلی وزیر اعظم بنیامن نیتن یاہو کے دوحہ حملے کا القاعدہ کے تعاقب سے موازنہ کرنے کی مذمت کرتے ہوئے کہا ہے کہ اسرائیلی وزیرِ اعظم کا بیان نہ صرف اسرائیل کے بزدلانہ حملے کا جواز پیش کرنے کی کوشش ہے بلکہ مستقبل میں بھی ریاستی خودمختاری کی خلاف ورزیوں کو جواز فراہم کرنے کی شرمناک کوشش ہے۔

بیان میں کہا گیا ہے کہ نیتن یاہو اس بات سے پوری طرح واقف ہیں کہ حماس کے دفتر کی میزبانی قطر کی ثالثی کی کوششوں کے فریم ورک کے تحت ہے جس کی امریکہ اور اسرائیل نے درخواست کی تھی۔

قطری وزارتِ خارجہ کا کہنا ہے کہ ’نیتن یاہو کا یہ الزام کہ قطر نے حماس کے وفد کو خفیہ طور پر پناہ دی، ایک ایسے جرم کو جواز فراہم کرنے کی مایوس کن کوشش ہے جس کی پوری دنیا نے مذمت کی۔‘

قطری وزارتِ خارجہ کا کہنا ہے کہ اسرائیلی وزیرِ اعظم نے دوحہ پر حملے کا جواز پیش کرنے کے لیے اس کا نائن الیون حملوں کے بعد القاعدہ کے تعاقب سے موازنہ کرنے کی کوشش کی۔

واضح رہے کہ اسرائیل نے منگل کے روز قطر کے دارالحکومت دوحہ میں حماس کے سینیئر رہنماؤں پر حملہ کیا تھا۔