ویزوں کے اجراء سے متعلق برطانیہ کا بڑا فیصلہ

برطانوی حکومت نے واضح کر دیا ہے کہ وہ ممالک جو برطانیہ میں مقیم غیر قانونی شہریوں کی واپسی میں رکاوٹ ڈالیں گے یا تاخیر سے کام لیں گے، ان کے لیے ویزا فراہمی کی تعداد کم کر دی جائے گی۔

 نومنتخب برطانوی وزیر داخلہ شبانہ محمود نے اس حوالے سے پاکستان سمیت متعدد ممالک کو تنبیہ جاری کی ہے۔ شبانہ محمود نے اپنے عہدے کا چارج سنبھالنے کے بعد پہلی بڑی ملاقات میں امریکا، کینیڈا، آسٹریلیا اور نیوزی لینڈ کے وزرائے داخلہ سے ملاقات کی، جنہیں اجتماعی طور پر "فائیو آئیز” کہا جاتا ہے۔ اس ملاقات میں ایک معاہدہ طے پایا جس کا مقصد ان افراد کی واپسی کو یقینی بنانا ہے جو ان ممالک میں بغیر قانونی حیثیت کے مقیم ہیں۔

غیر ملکی خبر رساں اداروں کے مطابق برطانوی وزیر داخلہ نے کہا کہ اگر کوئی ملک اپنے غیر قانونی شہریوں کو واپس لینے سے انکار کرے یا تعاون نہ کرے، تو برطانیہ ان ممالک کے لیے ویزوں کا اجراء معطل کر سکتا ہے۔ ان کا کہنا تھا کہ برطانیہ امیگریشن نظام کے غلط استعمال کو عوامی سلامتی کے لیے خطرہ سمجھتا ہے، اور اس چیلنج سے نمٹنے کے لیے قریبی اتحادیوں کے ساتھ مشترکہ اقدامات کیے جا رہے ہیں۔

معاہدے کے تحت تمام متعلقہ ممالک پر یہ ذمہ داری عائد کی گئی ہے کہ وہ اپنے شہریوں کو واپس لینے میں مکمل تعاون کریں، تاکہ واپسی کے عمل کو تیز اور مؤثر بنایا جا سکے۔

واضح رہے کہ ماضی میں برطانیہ نے پاکستان، بھارت، بنگلہ دیش، نائیجیریا، ایران، عراق اور گیمبیا کو ایسے ممالک کی فہرست میں شامل کیا تھا جو غیر قانونی مہاجرین کی واپسی میں تعاون نہیں کر رہے تھے۔

نئے عزم کے تحت فائیو آئیز ممالک نے آن لائن پلیٹ فارمز کے ذریعے انسانی اسمگلنگ اور غیر قانونی نقل و حرکت کے مسئلے سے نمٹنے کے لیے اپنے وسائل کو یکجا کرنے اور مشترکہ آپریشنل فریم ورک کو مزید مضبوط بنانے پر بھی اتفاق کیا ہے۔