اتوار، 30-نومبر،2025
اتوار 1447/06/09هـ (30-11-2025م)

چارلی کرک کے مبینہ قاتل کو گرفتار کرلیا گیا، ڈونلڈ ٹرمپ کا دعویٰ

12 ستمبر, 2025 19:14

امریکی صدر ڈونلڈ ٹرمپ نے دعویٰ کیا ہے کہ چارلی کرک کے مبینہ قاتل کو پکڑ لیا گیا۔ کہا، پولیس کی حراست میں ہے، قاتل کے حوالے سے تفصیلات جلد پریس بریفنگ میں بتائی جائیں گی۔

امریکی صدر ڈونلڈ ٹرمپ نے معاملے کی تصدیق کرتے ہوئے کہا کہ چارلی کرک کے قتل میں ملوث مشتبہ شخص کو گرفتار کر لیا گیا ہے۔

مشتبہ شخص کی شناخت ٹائلر رابنسن کے نام سے کی گئی ہے، جو بدھ کے روز یوٹاہ ویلی یونیورسٹی میں ہونے والے ایک پروگرام کے دوران اسنائپر حملے میں ملوث تھا۔

صدر ٹرمپ نے ”فاکس اینڈ فرینڈز“ کو انٹرویو دیتے ہوئے کہا ”مجھے لگتا ہے ہمارے پاس وہ ہے۔“

امریکی صدر نے مزید انکشاف کرتے ہوئے کہا ٹائلر رابنسن کو اُس کے ایک قریبی عزیز نے پہچانا، جب اُس نے پولیس کی جانب سے جاری کردہ سیکیورٹی فوٹیج دیکھی۔ اس عزیز نے مشتبہ شخص کو خود پولیس کے حوالے کر دیا۔

امریکی حکام نے بھی اس بات کی تصدیق کی ہے کہ رابنسن کو اس کے خاندان کے ایک فرد نے پہچان کر پولیس کی تحویل میں دیا۔

واقعہ بدھ کو اس وقت پیش آیا جب چارلی کرک، جو ایک معروف پوڈکاسٹ میزبان، مصنف اور صدر ٹرمپ کے قریبی ساتھی تھے، یوٹاہ ویلی یونیورسٹی میں ”Prove Me Wrong“ کے عنوان سے ایک مباحثے میں شریک تھے۔

تقریب کے دوران چھت سے چلائی گئی ایک اسنائپر گولی ان کی گردن پر لگی، جس سے وہ موقع پر جاں بحق ہو گئے۔ واقعے کے وقت تقریب میں تقریباً 3,000 افراد موجود تھے، جو گولی چلنے کے بعد خوفزدہ ہو کر منتشر ہو گئے۔

ایف بی آئی اور ریاستی حکام نے بتایا کہ قاتل نے تقریب سے چند منٹ قبل یونیورسٹی کی عمارت کی چھت تک رسائی حاصل کی اور وہاں سے فائرنگ کی۔ جائے وقوعہ سے ایک بولٹ ایکشن رائفل برآمد کی گئی ہے جو قتل میں استعمال ہوئی۔

سیکیورٹی کیمروں کی فوٹیج میں مشتبہ شخص کو ایک کالی شرٹ، سیاہ چشمے، اور بیس بال کیپ پہنے ہوئے دیکھا گیا، جس پر امریکی جھنڈے پر اُڑتے ہوئے عقاب کی تصویر نمایاں تھی۔

صدر ٹرمپ کے مطابق، قاتل کی حرکات و سکنات اتنی مخصوص تھیں کہ اسے صرف کوئی قریبی ہی پہچان سکتا تھا۔

”کوئی شخص صرف سر کے ہلکے سے جھکاؤ سے پہچانا جا سکتا ہے، جو کوئی عام آدمی نہیں پہچان سکتا۔“

ٹائلر رابنسن اس وقت یوٹاہ ریاستی قانون نافذ کرنے والے اداروں کی تحویل میں ہے، جب کہ مزید معلومات کے لیے حکام کی جانب سے پریس بریفنگ متوقع ہے۔

Catch all the دنیا News, Breaking News Event and Trending News Updates on GTV News


Join Our Whatsapp Channel GTV Whatsapp Official Channel to get the Daily News Update & Follow us on Google News.

اوپر تک سکرول کریں۔