نیٹو اگر روس سے ایندھن خریدنا بند کرے تو سخت پابندیاں عائد کریں گے، ٹرمپ

امریکی صدر ڈونلڈ ٹرمپ نے روس کے خلاف نیا بیان داغ دیا۔ سوشل میڈیا پر انھوں نے لکھا ہے کہ اگر نیٹو کے رکن ممالک رضامند ہوں تو روس پر سخت پابندیاں لگانے کے لیے تیار ہیں۔ انہوں نے کہا کہ نیٹو ممالک کو بھی روس کے خلاف سخت اقدامات اٹھانے چاہئیں اور روس سے توانائی کی خریداری بند کر دینی چاہیے تاکہ مزید سخت پابندیاں عائد کی جا سکیں۔

ٹرمپ نے مزید کہا کہ چین پر 50 سے 100 فیصد مشروط ٹیرف عائد کرنا یوکرین جنگ کے خاتمے میں مددگار ثابت ہو گا۔

ان کا کہنا تھا کہ نیٹو کی طرف سے چین پر عائد کیے جانے والے یہ ٹیرف روس-یوکرین جنگ ختم ہونے کے بعد معطل کر دیے جائیں گے کیونکہ چین روس پر مضبوط کنٹرول رکھتا ہے اور ٹیرفز اس گرفت کو کمزور کریں گے۔

امریکی صدر نے واضح کیا کہ یوکرین کی جنگ امریکہ کی نہیں بلکہ جو بائیڈن اور زیلنسکی نے شروع کی ہے، اور وہ خود اس جنگ کو روکنے اور یوکرینیوں اور روسیوں کی جان بچانے کی کوشش کر رہے ہیں۔

ٹرمپ نے کہا کہ اگر نیٹو ان کی تجویز پر عمل کرے تو یوکرین جنگ جلد ختم ہو سکتی ہے، ورنہ یہ وقت اور امریکی وسائل ضائع ہوں گے۔

دوسری جانب، امریکہ نے جی 7 اور یورپی یونین سے کہا ہے کہ وہ روسی تیل خریدنے والے ممالک خصوصاً بھارت اور چین پر محصولات عائد کریں۔

جی 7 کے وزرائے خزانہ کی میٹنگ میں امریکی وزیر خزانہ اسکاٹ بیسنٹ نے کہا کہ اتحادی ممالک کو امریکہ کے ساتھ مل کر روسی تیل خریدنے والے ممالک پر محصولات لگانے چاہئیں تاکہ روسی صدر پوتن کی جنگی مشین کو کمزور کیا جا سکے۔

اجلاس میں روس کے منجمد اثاثوں کو یوکرین کے دفاع کے لیے استعمال کرنے پر بھی بات چیت کو تیز کرنے کا فیصلہ کیا گیا۔