عرب اسلامی سربراہی اجلاس کا مشترکہ اعلامیہ جاری کردیا گیا

عرب اسلامی سربراہی اجلاس کا مشترکہ اعلامیہ جاری کردیا گیا۔ اعلامیے کے مطابق قطر کےخلاف اسرائیلی جارحیت نے خطے میں امن کے امکانات کو ختم کردیا۔

اعلامیے میں مزید لکھا گیا کہ  اسرائیل کے غیر قانونی حملے کی سخت ترین الفاظ میں مذمت کرتے ہیں،  قطر کے ساتھ مکمل یکجہتی اور جوابی اقدامات کی بھرپور حمایت کا اعلان بھی کیاگیا۔

اجلاس میں مسلم ممالک کے رہ نماؤں نے اسرائیلی حملے کے جواب میں قطر کے مہذب اور دانش مندانہ طرز عمل کو سراہا، ساتھ میں غزہ پر اسرائیلی جارحیت روکنے کے لیے قطر، مصر اور امریکا کی کوششوں کی حمایت کا اعلان کیاگیا۔

اسرائیلی جارحیت کو کسی بھی جواز کے تحت قبول کرنے سے مکمل انکار کیا گیا۔

اجلاس میں وزیراعظم شہباز شریف نے عرب اسلامی ٹاسک فورس کے قیام کی تجویز بھی دی۔ وزیراعظم نے کہاکہ پاکستان قطر کے ساتھ مکمل یکجہتی کا اظہار کرتا ہے، اسرائیل نے حملہ کرکے امن کی کوششوں کو سبوتاژ کیا، اسرائیلی جارحیت سے امن کو کوششوں کو شدید دھچکا لگا۔

دوحہ ۔ قطر میں عرب اسلامی ممالک کے ہنگامی اجلاس کے موقع پر وزیراعظم شہباز شریف کی عالمی رہنمائوں سے ملاقاتیں

وزیراعظم کی ترکیہ کے صدر رجب طیب ایردوان، سعودی عرب کے ولی عہد شہزادہ محمد بن سلمان بن عبدالعزیز آل سعود سے ملاقاتیں

وزیراعظم کی فلسطین کے صدر محمود عباس ، امیر قطر شیخ… pic.twitter.com/ch01CMqBqX

— Government of Pakistan (@GovtofPakistan) September 15, 2025

انھوں نے مزید کہا کہ اسرائیل نے غزہ میں فلسطینیوں کی نسل کشی جاری رکھی ہوئی ہے، غزہ میں اسرائیلی جارحیت فوری طور پر روکی جائے، غزہ میں انسانیت سسک رہی ہے، اسرائیل کو انسانیت کے خلاف جرائم پر جوابدہ  کرنا ہوگا۔

اجلاس کے تناظر میں وزیراعظم نے اسرائیلی جارحیت کے خلاف عرب اسلامی ٹاسک فورس تشکیل دینے کی تجویز بھی پیش کی، مزید کہا کہ اسرائیل کی اقوام متحدہ میں رکنیت معطل کی جائے۔

قبل ازیں سعودی ولی عہد محمد بن سلمان سے ملاقات میں وزیراعظم شہبازشریف نے اسرائیلی اقدام کو مشرق وسطیٰ میں امن  کوششوں کو سبوتاژ کرنے کی دانستہ کوشش قراردیا۔

وزیر اعظم نے سعودی ولی عہد محمد بن سلمان کی قیادت کو سراہا، وزیراعظم نے نازک وقت میں امت مسلمہ کو متحد کرنے پر سعودی ولی عہد کی تعریف کی۔