ٹرمپ کے بھارت مخالف اقدامات جاری، ایچ ون بی ویزا پر سالانہ ایک لاکھ ڈالر فیس عائد

امریکی صدر ڈونلڈ ٹرمپ نے بھارت مخالف اقدامات کا سلسلہ دراز کردیا۔ تازہ نئے ایگزیکٹو آرڈر پر دستخط کرتے ہوئے ایچ ون بی ویزا پرسالانہ ایک لاکھ ڈالر فیس عائد کر دی۔

یہ پالیسی 21 ستمبر 2025 سے نافذ ہوگی اور اس کا سب سے زیادہ اثر بھارتی شہریوں پر پڑے گا جو اس ویزے کے 71 فیصد حصے کے حامل ہیں۔

امریکی صدر ڈونلڈ ٹرمپ کے حکم نامے کے تحت کمپنیوں کو ہر ایچ ون بی ویزا ہولڈر کے لیے سالانہ 100,000 ڈالر جمع کرانے ہوں گے جبکہ بعض “قومی مفاد” کیسز کواس شرط سے استثنا حاصل ہوگا۔

اس کے ساتھ ہی ایچ ون بی ملازمتوں کے لیے کم از کم تنخواہ کی شرط بھی بڑھا دی گئی ہے مزید برآں امریکی صدر نے امیروں کے لیے “گولڈ کارڈ” ویزا متعارف کرایا ہے جس کے لیے ایک ملین ڈالر کی فیس مقرر کی گئی ہے۔

تجزیہ کاروں کے مطابق اس فیصلے نے بھارتی طلبہ اور نوجوان پروفیشنلز کوشدید دھچکا دیا ہے، ایک تیلگو شہری کے مطابق بھارت سے ہزاروں طلبہ 40 سے 50 لاکھ روپے کے تعلیمی قرضے لے کرامریکا میں تعلیمی سلسلہ جاری رکھے ہوئے ہیں۔

نئی پالیسی کے بعد ان کے پاس امریکا میں قیام کے محدود مواقع بچیں گے اور وہ ممکنہ طور پروہ بھاری قرضوں کے بوجھ کے ساتھ واپس آ جائیں گے، ان میں سے کئی طلبہ ایک دن میں “پراؤڈ این آر آئیز” سے “پُور انڈینز” میں بدل گئے ہیں۔

ٹیکنالوجی کمپنیوں جیسے ایمیزون اورمائیکروسافٹ نے اس اقدام پرتشویش ظاہر کی ہے کیونکہ ان کے بیشترملازمین بھارت اورچین سے آتے ہیں یہ کمپنیاں اب بڑھتے ہوئے اخراجات اورٹیلنٹ کو برقراررکھنے کے مسائل کا سامنا کریںگی۔

قانونی ماہرین نے عندیہ دیا ہے کہ یہ اقدام عدالت میں چیلنج کیا جا سکتا ہے جبکہ بھارت میں سوشل میڈیا پر ٹرمپ کے فیصلے پر سخت ردعمل سامنے آیا ہے۔