چین غزہ میں جنگ بندی اور جنگ کے خاتمے کے لیے پُرعزم ہے، وزیر خارجہ وانگ یی

بیجنگ: چینی وزیر خارجہ وانگ یی نے کہا ہے کہ چین غزہ میں جاری جنگ کو ختم کرنے اور فوری جنگ بندی کے لیے پرعزم ہے، جبکہ عالمی برادری کو فلسطین کی اقوامِ متحدہ میں مکمل رکنیت کی حمایت کرنی چاہیے۔

وانگ یی نے اپنے بیان میں کہا کہ دو برسوں سے جاری غزہ جنگ نے ایک بے مثال انسانی المیے کو جنم دیا ہے، جس کے اثرات نہ صرف فلسطینی عوام بلکہ پورے خطے پر پڑ رہے ہیں۔

ان کا کہنا تھا کہ اسرائیلی کارروائیاں بین الاقوامی قوانین کی کھلی خلاف ورزی ہیں جو مشرقِ وسطیٰ کے استحکام اور دو ریاستی حل کے امکانات کو شدید نقصان پہنچا رہی ہیں۔

وانگ یی نے واضح کیا کہ چین فلسطینی عوام کے حقِ خودارادیت اور ان کے جائز قومی حقوق کی حمایت جاری رکھے گا اور عالمی برادری کے ساتھ مل کر خطے میں امن قائم کرنے کے لیے بھرپور کردار ادا کرے گا۔