امریکی ویزا فیس میں بے تحاشہ اضافہ، چین کا نوجوانوں کیلئے "کے” ویزا کا اعلان

چین نے سائنس اور ٹیکنالوجی کے نوجوان ماہرین کیلئے ’K ’ ویزا متعارف کرانے کا اعلان کردیا۔

غیر ملکی خبر رساں ادارے کے مطابق سائنس اور ٹیکنالوجی کے نوجوان ماہرین کیلئے متعارف کردہ  ’K ’ ویزا  یکم اکتوبر سے نافذ ہوگا جس کے تحت  اہل امیدواروں کو داخلے، قیام اور بار بار آنے جانے کی سہولت زیادہ آسانی سے ملے گی۔

 K ویزا ہولڈرز  تعلیم،  ثقافت،  سائنس و ٹیکنالوجی اور کاروباری تحقیق میں حصہ لے سکیں گے جب کہ اس کے لیے کسی ملکی آجر یا ادارے کے دعوت نامے کی ضرورت نہیں ہوگی۔

حکام کے مطابق یہ اقدام عالمی سائنسی ٹیلنٹ کو راغب کرنے اور بین الاقوامی تعاون بڑھانے کے لیے ہے۔

واضح رہے کہ گزشتہ دنوں امریکی صدر نے امیگریشن محدود کرنے کے لیے ایچ ون بی ورکر ویزا کی سالانہ فیس ایک لاکھ ڈالر مقرر کردی تھی اور اب ایچ ون بی ویزا پالیسی سےمتعلق نیا ایگزیکٹو آرڈر نافذ ہوگیا ہے۔

ماہرین کا کہنا ہے کہ امریکا میں ایچ ون بی درخواستوں پرایک لاکھ ڈالر فیس کے بعد یہ ویزا جنوبی ایشیا سمیت عالمی ٹیلنٹ کیلئے  پرکشش متبادل بن سکتا ہے۔