برطانیہ نے پہلی بار فلسطین کو اپنے سرکاری نقشوں میں شامل کرلیا

برطانوی حکومت نے تاریخ میں پہلی مرتبہ اپنے سرکاری آن لائن نقشہ جات اور سرکاری پلیٹ فارمز پر "فلسطینی مقبوضہ علاقے” کے بجائے "ریاستِ فلسطین” درج کر دیا ہے۔

یہ بڑی پیش رفت وزیراعظم کیر اسٹارمر کے اس اعلان کے بعد سامنے آئی ہے جس میں انہوں نے فلسطین کو باضابطہ طور پر تسلیم کرنے کا اعلان کیا۔

برطانوی اخبار ٹیلی گراف کے مطابق، وزارتِ خارجہ نے کئی اہم ویب صفحات میں تبدیلی کرتے ہوئے "Occupied Palestinian Territories” کی جگہ "Palestine” درج کر دیا ہے۔ ان صفحات میں اسرائیل و فلسطین سے متعلق سفری ہدایات، غیر ملکی دفاتر کی فہرست اور خطے کے سرکاری نقشے شامل ہیں۔

وزیراعظم اسٹارمر نے پریس کانفرنس میں کہا کہ برطانیہ مشرقِ وسطیٰ میں امن کے قیام اور دو ریاستی حل کو عملی جامہ پہنانے کے لیے اپنا کردار ادا کر رہا ہے۔

ان کا کہنا تھا ہماری کوشش ہے کہ بڑھتی ہوئی تباہی اور تشویش ناک صورتحال کے مقابلے میں امن کے امکانات کو زندہ رکھا جائے۔ حماس کا مستقبل نہ حکومت میں ہے اور نہ ہی سیکیورٹی کے ڈھانچے میں۔

برطانیہ اس فیصلے کے بعد جی-سیون کے ان ممالک کی فہرست میں شامل ہوگیا ہے جو فلسطین کو تسلیم کر چکے ہیں۔ اس سے پہلے کینیڈا اور آسٹریلیا بھی فلسطین کو تسلیم کرنے کا اعلان کر چکے ہیں۔

یہ اقدام ایسے وقت میں سامنے آیا ہے جب اقوام متحدہ کی جنرل اسمبلی کے اجلاس کے موقع پر سعودی عرب اور فرانس کی سربراہی میں ایک اہم کانفرنس منعقد ہونے جا رہی ہے، جہاں توقع ہے کہ مزید ممالک — خصوصاً فرانس — فلسطین کو باضابطہ طور پر تسلیم کرنے کا اعلان کریں گے۔