منی پور میں مودی راج کے خلاف مزاحمتی لہر تیز، بھارتی فوجی قافلے پر بڑا حملہ

بھارت کی شمال مشرقی ریاست منی پور کی سیکیورٹی صورتحال نازک ہوگئی ہے۔

مودی حکومت کے جبر و ستم کے خلاف منی پور میں آزادی کی مسلح جدوجہد شدت اختیار کر گئی ہے اور مقامی نوجوان قابض بھارتی فوج کے خلاف مزاحمتی صفوں میں شامل ہو رہے ہیں، بھارتی فوجی قافلوں اور چوکیوں پر بھرپور حملے کیے جا رہے ہیں۔

بھارتی میڈیا رپورٹس کے مطابق نمبول کے قریب نامعلوم مسلح افراد نے 33 آسام رائفلز کے قافلے پر بڑا حملہ کیا۔

بھارتی میڈیا نے تصدیق کی ہے کہ فائرنگ کے نتیجے میں آسام رائفلز کے متعدد اہلکار ہلاک جبکہ کئی زخمی ہوئے۔ مسلح افراد نے گھات لگا کر ہائی وے پر آسام رائفلز کے قافلے پر اچانک حملہ کیا۔

بھارتی میڈیا کے مطابق 33 آسام رائفلز کا دستہ پٹسوئی کمپنی آپریٹنگ بیس سے نمبول کمپنی آپریٹنگ بیس کی طرف روانہ تھا، تاہم تاحال کسی عسکریت پسند تنظیم نے حملے کی ذمہ داری قبول نہیں کی، صورتحال مزید تناؤ کا شکار ہو گئی ہے۔

نمبول کے اطراف میں سرچ آپریشن جاری ہے اور فورسز حملہ آوروں کی گرفتاری کے لیے چھاپے مار رہی ہیں، منی پور کی بگڑتی سیکورٹی صورتحال نے بھارتی فوج کے سیکیورٹی دعوؤں کو جھوٹا ثابت کر دیا ہے۔

آزادی کے خواہاں مقامی نوجوانوں نے حالیہ حملوں سے یہ واضح کر دیا ہے کہ منی پور اب نئی دہلی کے کنٹرول سے نکل چکا ہے، بڑھتی مزاحمت اس بات کا ثبوت ہے کہ جبر اور فوجی تسلط منی پور کے عوام کی آزادی کے خواب کو ختم نہیں کر سکتا۔