عالمی ادارہ صحت نے امریکی صدر ڈونلڈ ٹرمپ کے بیان کی تردید کردی

امریکی صدر ٹرمپ کے  پیراسیٹامول (Tylenol) سے آٹزم کا خطرہ ہونے کے متنازع دعوے کی عالمی ادارہ صحت اور  یورپی میڈیسن ایجنسی نے تردید کر دی۔

ترجمان عالمی ادارہ صحت کا کہنا ہے دوران حمل  پیراسیٹامول کا استعمال  اور آٹزم کے درمیان تعلق  کی بات ثابت شدہ نہیں۔

یورپی میڈیسن ایجنسی نےکہا ہےکہ  شواہد سے پیراسیٹامول کے استعمال اور آٹزم کے درمیان کوئی تعلق ثابت نہیں ہوا ہے، دوران حمل محفوظ مقدار میں پیراسیٹامول لی جاسکتی ہے۔

خیال رہے کہ عام طور پر بخار اور درد کے علاج کے لیے استعمال ہونے والی دوا پیراسیٹامول، امریکا میں ٹائلی نال کے نام سے جانی جاتی ہے۔

گزشتہ روز ٹرمپ نےکہا تھا کہ دوران حمل ٹائلی نال کےاستعمال سے بچے میں آٹزم کا خطرہ بڑھ جاتا ہے۔

ٹرمپ کا یہ بھی کہنا تھا کہ  ایف ڈی اے ڈاکٹروں کو مشورہ دےگی کہ حاملہ عورتوں کو ٹائلی نال دینے سے گریز کریں، ٹائلی نال اچھی دوائی نہیں ، اس لیے ایف ڈی اے سختی سے ہدایت کرے گی کہ اگر انتہائی طبی ضرورت نہ ہو تو حاملہ خواتین اس کے استعمال کو محدود کریں۔