مودی کے ذاتی تعلقات، تصویری نمائش اور دکھاوے پر مبنی سفارتکاری بے نقاب

مودی حکومت کی خارجہ پالیسی شدید تنقید کی زد میں آگئی ہے۔

بھارتی اپوزیشن جماعتوں نے وزیراعظم نریندر مودی کے ذاتی تعلقات، تصویری نمائش اور دکھاوے پر مبنی سفارتکاری کو مکمل طور پر ناکام قرار دیتے ہوئے کہا ہے کہ بھارت عالمی سطح پر کمزور اور تنہائی کا شکار ہو چکا ہے۔

اپوزیشن رہنماؤں کے مطابق "شائننگ انڈیا” کا نعرہ اب صرف پابندیوں، تجارتی رکاوٹوں اور ویزا مسائل تک محدود ہو گیا ہے۔

اسد الدین اویسی نے کہا کہ ہاؤڈی مودی اور نمستے ٹرمپ جیسی مہمات سے بھارت کو کچھ حاصل نہیں ہوا، جبکہ ایچ ون بی ویزا پابندیوں سے یہ بات واضح ہے کہ امریکا کو ہندوستان کی کوئی پرواہ نہیں۔

کانگریس رہنما اروند کیجریوال نے سوال اٹھایا کہ 140 کروڑ عوام کا وزیراعظم اتنا بے بس کیوں ہے؟ ملیکارجن کھرگے کے مطابق 50 فیصد ٹیرف سے بھارت کی معیشت کو 21 ہزار 700 ارب روپے کا نقصان ہوا ہے جبکہ چابہار بندرگاہ سے استثنیٰ ختم ہونے سے اسٹریٹجک مفادات کو بھی دھچکا لگا ہے۔

کانگریس رہنما گورو گگوئی نے کہا کہ امریکا کے حالیہ فیصلے نے ہندوستان کے مستقبل کو نشانہ بنایا ہے لیکن مودی کی خاموشی اور دکھاوا بھارتی شہریوں کے لیے نقصان دہ ثابت ہو رہا ہے۔ کپل سیبال نے طنزیہ انداز میں کہا کہ ذاتی تعلقات، گلے ملنا اور "اب کی بار ٹرمپ سرکار” کہاں گئے؟

اپوزیشن کا کہنا ہے کہ دکھاوے، جھوٹ، دھوکے اور تکبر پر چلنے والی مودی حکومت کی خارجہ پالیسی زمین بوس ہو چکی ہے، اور انتہا پسند مودی اپنی سیاسی بقا کے لیے بھارت سمیت پورے خطے کو تباہی کی طرف لے جا رہا ہے۔