فلسطینی عوام بے پناہ تکالیف سہہ رہے ہیں، کینیا کا اظہارِ تشویش

کینیا کے صدر ولیم رُتو نے کہا ہے کہ فلسطینی عوام بے پناہ تکالیف سہہ رہے ہیں۔

کینیا کے صدر ولیم رُتو نے اقوام متحدہ کی جنرل اسمبلی سے خطاب میں غزہ کی صورتحال پر شدید تشویش کا اظہار کیا ہے۔

انہوں نے کہا کہ اسرائیلی فوجی کارروائیوں کے باعث فلسطینی عوام بے پناہ مشکلات اور انسانی المیے سے دوچار ہیں، جو پوری دنیا کے لیے باعثِ تشویش ہے۔

صدر رُتو نے اسرائیلی یرغمالیوں کی غیر مشروط رہائی کا مطالبہ کرتے ہوئے کہا کہ یہ افریقی یونین اور اقوام متحدہ کی قراردادوں کے عین مطابق ہے۔

انہوں نے عالمی برادری پر زور دیا کہ فوری اور مستقل جنگ بندی قائم کی جائے، بین الاقوامی انسانی قوانین پر عمل کیا جائے اور ایک قابلِ اعتماد سیاسی عمل شروع کیا جائے۔

کینیا کے صدر نے واضح کیا کہ انہی اقدامات کے ذریعے فلسطین کے دو ریاستی حل کو عملی شکل دی جا سکتی ہے۔