متحدہ عرب امارات جانے کے خواہشمند پاکستانیوں کیلئے بڑی خبر آگئی

یو اے ای کا ویزہ حاصل کرنے کیلئے پاسپورٹ کے بیرونی کور پیج کی کاپی جمع کرانا لازمی قراردیدیا گیا ہے۔

متحدہ عرب امارات (UAE) نے انٹری پرمٹ حاصل کرنے کے خواہشمند افراد کے لیے نئی شرط متعارف کرا دی ہے، جس کے تحت اب ہر درخواست گزار کو اپنے پاسپورٹ کے بیرونی کور پیج کی کاپی بھی دیگر دستاویزات کے ساتھ جمع کرانا لازم ہوگا۔ اماراتی حکام کی جانب سے یہ ضابطہ فوری طور پر نافذ کر دیا گیا ہے، جس کی تصدیق دبئی میں واقع امیر سینٹر کے نمائندے نے بھی کی ہے۔

خلیج ٹائمز کی رپورٹ کے مطابق سرکاری سطح پر جاری نوٹس میں واضح کیا گیا ہے کہ انٹری پرمٹ کی ہر درخواست کے ساتھ پاسپورٹ کے کور پیج کی اسکین شدہ کاپی منسلک کرنا ضروری ہوگی۔ اس سے قبل ویزہ درخواست کے لیے پاسپورٹ کی اندرونی معلوماتی صفحے کی کاپی، واضح پاسپورٹ سائز تصویر، ہوٹل بکنگ کی تصدیق اور ریٹرن ایئر ٹکٹ جیسی دستاویزات لازمی قرار دی گئی تھیں، تاہم اب اس فہرست میں ایک نئی شق کا اضافہ کیا گیا ہے۔

نئی شرط کے اعلان نے جہاں مسافروں کو اچانک تیاریاں بدلنے پر مجبور کر دیا ہے، وہیں ٹریول ایجنٹس اور ویزہ کنسلٹنٹس میں بھی تشویش پائی جا رہی ہے۔ اماراتی حکام کی جانب سے اس فیصلے کی وجوہات تاحال سامنے نہیں آئیں، اور نہ ہی اس پر کوئی باضابطہ وضاحت جاری کی گئی ہے۔

تاہم ماہرین کا خیال ہے کہ پاسپورٹ کے کور پیج کی طلب کا مقصد دستاویزات کی درستگی کو یقینی بنانا اور شناخت کے عمل کو مزید شفاف بنانا ہو سکتا ہے۔ ٹریول انڈسٹری سے وابستہ افراد کا کہنا ہے کہ بعض اوقات کور پیج پر ملک کا سرکاری نشان یا پاسپورٹ کے اجرا سے متعلق اہم تفصیلات موجود ہوتی ہیں، جو درخواست دہندہ کی شناخت کی تصدیق میں مدد فراہم کر سکتی ہیں۔

یہ نئی ہدایت ایسے وقت میں سامنے آئی ہے جب یو اے ای سیاحوں اور کاروباری افراد کے لیے دنیا کا ایک اہم اور پرکشش مقام بن چکا ہے، اور اماراتی حکام وقتاً فوقتاً ویزہ اور امیگریشن پالیسیوں میں ترامیم کرتے رہتے ہیں۔

مسافروں کو مشورہ دیا جا رہا ہے کہ کسی بھی پریشانی یا تاخیر سے بچنے کے لیے ویزہ یا انٹری پرمٹ کی درخواست کے ساتھ تمام ضروری دستاویزات، بشمول پاسپورٹ کے کور پیج کی واضح کاپی، مکمل طور پر جمع کرائیں تاکہ درخواست کے عمل میں کسی قسم کی رکاوٹ پیش نہ آئے۔