سعودی عرب نے ہر قسم کے ویزا ہولڈرز کو عمرہ کی اجازت دیدی

سعودی وزارتِ حج و عمرہ نے ایک اہم اعلان میں تصدیق کی ہے کہ اب سعودی عرب میں موجود تمام اقسام کے ویزا رکھنے والے افراد کو عمرہ کی ادائیگی کی اجازت دے دی گئی ہے۔

 اس سہولت کا اطلاق ذاتی، خاندانی، ای-ٹورسٹ، ٹرانزٹ، ورک اور دیگر تمام ویزوں پر ہوگا، جس کا مقصد دنیا بھر کے مسلمانوں کے لیے عمرہ کے سفر کو مزید آسان، پُرامن اور سہل بنانا ہے۔

وزارت کے مطابق یہ اقدام خادم الحرمین الشریفین شاہ سلمان بن عبدالعزیز اور ولی عہد و وزیراعظم شہزادہ محمد بن سلمان کے وژن 2030 کا حصہ ہے، جس کے تحت زائرین کو جدید سہولیات اور روحانی سکون فراہم کرنا سعودی حکومت کی اولین ترجیح ہے۔

اس مقصد کے لیے حال ہی میں "نسک عمرہ پلیٹ فارم” کا آغاز بھی کر دیا گیا ہے، جس کے ذریعے عمرہ ادا کرنے کے خواہشمند افراد آن لائن پیکجز منتخب کر کے الیکٹرانک پرمٹ حاصل کر سکتے ہیں۔ یہ ڈیجیٹل نظام زائرین کو تاریخ، وقت اور خدمات کے انتخاب میں مکمل آزادی اور آسانی فراہم کرتا ہے۔

وزارتِ حج و عمرہ کے مطابق اس اقدام سے نہ صرف حج و عمرہ خدمات کا دائرہ وسیع ہوگا بلکہ دنیا بھر سے آنے والے زائرین کو بہتر سہولتیں، سلامتی اور آرام دہ ماحول میسر آئے گا۔

بیان میں کہا گیا کہ یہ سہولت اس عزم کی عکاسی کرتی ہے کہ زائرین کو دونوں مقدس مساجد کی زیارت اور عبادات کے دوران ایک بابرکت اور پرسکون ماحول فراہم کیا جائے۔