غزہ جنگ بندی مذاکرات کا پہلا دور مکمل، حماس کا چھ سرکردہ فلسطینی قیدیوں کی رہائی اور امداد کی فراہمی کا مطالبہ

غزہ جنگ کے خاتمے کے لیے حماس، اسرائیل اور ثالث ممالک کے درمیان مذاکرات کا پہلا دور مکمل ہوگیا، بات چیت کا یہ مرحلہ مصر کے ساحلی شہر شرم الشیخ میں ہوا، جہاں آج فریقین کے درمیان دوبارہ ملاقات متوقع ہے۔

 حماس وفد کی قیادت حماس کے سینئر رہنما اور جنگ بندی مذاکراتی ٹیم کے سربراہ خلیل الحیہ نے کی، جبکہ امریکی مشرقِ وسطیٰ کے خصوصی ایلچی اسٹیو وٹکوف اور صدر ٹرمپ کے داماد جیرڈ کشنر بھی مذاکرات میں شریک ہوئے۔ اجلاس میں قطر اور مصر کے وفود نے ثالثی کا کردار ادا کیا۔

ذرائع کے مطابق حماس نے مذاکرات میں یرغمالیوں کی رہائی، غزہ سے اسرائیلی انخلا اور اس کے لیے ایک واضح ٹائم لائن پیش کی۔

عرب میڈیا نے بتایا کہ حماس نے چھ سرکردہ فلسطینی قیدیوں کی رہائی اور غزہ میں بڑے پیمانے پر امداد کی فراہمی کا مطالبہ بھی کیا، تنظیم کا کہنا ہے کہ وہ ایسی ضمانت چاہتی ہے جس کے تحت اسرائیل یرغمالیوں کی رہائی کے بعد معاہدے کی خلاف ورزی نہ کرے۔

دوسری جانب اسرائیلی سیکیورٹی ذرائع کے مطابق ابتدائی مرحلے میں صرف یرغمالیوں کی رہائی پر توجہ دی جائے گی، اور حماس کو اس حوالے سے چند دن کا وقت دیا جائے گا۔

اسرائیل کا مؤقف ہے کہ وہ ٹرمپ منصوبے کے تحت فی الحال فوج کو نام نہاد زرد لکیر تک واپس بلانے پر آمادہ نہیں، بلکہ اسٹریٹجک بفر زون قائم کرے گا، جس کے بعد مزید انخلا حماس کے ساتھ طے شدہ شرائط پر منحصر ہوگا۔

وائٹ ہاؤس کی ترجمان کیرولائن لیویٹ نے تصدیق کی کہ صدر ٹرمپ جلد از جلد یرغمالیوں کی رہائی چاہتے ہیں تاکہ مذاکرات کے اگلے مرحلے کی طرف پیش رفت ممکن ہو۔

ان کے مطابق موجودہ بات چیت میں یرغمالیوں اور سیاسی قیدیوں کی فہرستوں پر تبادلۂ خیال جاری ہے تاکہ رہائی کے لیے مناسب ماحول تیار کیا جا سکے۔