سو فیصد ٹیرف کے خلاف چین کی امریکا کو جوابی کارروائی کی دھمکی

چین نے امریکا کی جانب سے 100 فیصد ٹیرف عائد کرنے کی دھمکی واپس نہ لینے پر جوابی اقدامات کی دھمکی دے ڈالی۔

چین نے خبردار کرتے ہوئے کہا کہ اگر امریکی صدر نے فیصلہ نہ بدلا تو بیجنگ جوابی اقدامات کرے گا۔

سی این این کی ایک رپورٹ کے مطابق ڈونلڈ ٹرمپ نے چین سے درآمدات پر نئے اور بلند ٹیرف عائد کرنے کی دھمکی دی تھی، جس کے جواب میں چین نے سخت موقف اختیار کیا ہے۔

چینی وزارتِ تجارت کے ترجمان نے ایک بیان میں کہا کہ چین کے ساتھ بات چیت کے لیے بلند ٹیرف کی دھمکیاں دینا صحیھ طریقہ نہیں، اگر امریکا یکطرفہ اقدامات پر قائم رہا تو چین اپنے حقوق اور مفادات کے تحفظ کے لیے جوابی کارروائی کرے گا۔

ترجمان کا کہنا تھا کہ چین کا موقف ہمیشہ واضح رہا ہے، ہم جنگ نہیں چاہتے لیکن اس سے خوفزدہ بھی نہیں ہیں۔

امریکی نشریاتی ادارے کے مطابق چین نے گزشتہ ہفتے نایاب معدنیات کی برآمدات پر نئی پابندیاں عائد کی تھیں، جس سے امریکا اور چین کے درمیان بڑھتی ہوئی تجارتی کشیدگی مزید گہری ہوگئی ہے۔

تجزیہ کاروں کے مطابق جاری تناؤ کے باعث تجارتی مذاکرات میں مہینوں کی پیش رفت خطرے میں پڑ گئی ہے۔