غزہ کے مستقبل سے متعلق فیصلہ فلسطینی عوام کی مرضی کے خلاف نہیں کیا جانا چاہیے، چین

چینی وزیر خارجہ وانگ ژی نے کہا ہے کہ غزہ کے مستقبل سے متعلق فیصلہ فلسطینی عوام کی مرضی کے خلاف نہیں کیا جانا چاہیے۔

بین الاقوامی میڈیا کے مطابق چینی وزیرِ خارجہ وانگ ژی نے پریس کانفرنس کے دوران کہا کہ عالمی برادری کا متفقہ موقف یہی ہے کہ فلسطین پر فلسطینیوں کی حکومت ہونی چاہیے، غزہ کے مستقبل سے متعلق کوئی بھی فیصلہ فلسطینی عوام کی مرضی کے بغیر نہیں ہونا چاہیے۔

انہوں نے کہا کہ چین غزہ امن منصوبے کا خیر مقدم کرتا ہے اور مشرقِ وسطیٰ میں امن و استحکام کے لیے ہونے والی تمام کوششوں کی حمایت کرتا ہے، “غزہ میں انسانی المیہ اکیسویں صدی پر ایک بدنما داغ ہے، جس نے دنیا کے انسانی ضمیر کو جھنجھوڑ دیا ہے۔”

چینی وزیرِ خارجہ نے عالمی برادری پر زور دیا کہ وہ اس اصول کو یقینی بنائے کہ غزہ کی حکمرانی کا حق غزہ کے عوام کے پاس ہی رہے اور کوئی فریق ان کی آزادی یا خود مختاری پر سمجھوتہ نہ کرے۔