روس کا پاکستان- افغان سرحدی کشیدگی پر اظہارِ تشویش، تحمل و سفارتی حل پر زور

ماسکو: روسی وزارتِ خارجہ کی ترجمان ماریا زاخارووا نے افغانستان اور پاکستان کے درمیان حالیہ سرحدی جھڑپوں پر گہری تشویش کا اظہار کرتے ہوئے دونوں ممالک سے تحمل اور سفارتی تدبر کا مظاہرہ کرنے کی اپیل کی ہے۔

ماریا زاخارووا کے مطابق، افغان۔پاکستان سرحد پر 10 اور 11 اکتوبر کو ہونے والی جھڑپوں میں دونوں جانب سے مختلف نوعیت کے مؤقف سامنے آئے ہیں، جبکہ فائرنگ اور فضائی حملوں کی اطلاعات نے سرحدی علاقے، بشمول پشتون قبائلی پٹی، کو متاثر کیا ہے۔

روسی ترجمان نے بتایا کہ دستیاب معلومات کے مطابق ان جھڑپوں میں دونوں ممالک کے فوجی اہلکاروں کے جانی نقصان کی خبریں موصول ہوئیں، تاہم حالیہ رپورٹس کے مطابق صورتحال اب بتدریج استحکام کی جانب بڑھ رہی ہے، جس کا روس خیرمقدم کرتا ہے۔

زاخارووا نے کہا کہ ماسکو کابل اور اسلام آباد سے توقع رکھتا ہے کہ وہ تمام اختلافات کو سیاسی و سفارتی ذرائع سے حل کریں گے۔ انہوں نے امید ظاہر کی کہ افغانستان اور پاکستان کے درمیان انسدادِ دہشت گردی اور علاقائی سلامتی سے متعلق تعمیری مکالمہ جلد بحال ہوگا۔

روسی وزارتِ خارجہ کی جانب سے جاری یہ بیان اس وقت سامنے آیا ہے جب دونوں ممالک کی افواج کے درمیان سرحدی کشیدگی نے خطے میں سلامتی کے حوالے سے خدشات کو جنم دیا ہے۔