بھارتی نژاد سابق امریکی مشیر ایشلے جے ٹیلِس جاسوسی کے شبے میں گرفتار

واشنگٹن: بھارتی نژاد سابق امریکی نیشنل سیکیورٹی کونسل مشیر ایشلے جے ٹیلِس کو ایف بی آئی نے خفیہ دفاعی معلومات رکھنے اور چینی حکام سے مشتبہ ملاقاتوں کے الزام میں گرفتار کر لیا ہے۔

رپورٹ کے مطابق ایشلے جے ٹیلِس امریکی حکومت کی بھارت، پاکستان اور جنوبی ایشیا کے بارے میں پالیسی سازی میں کلیدی مشیر رہ چکے ہیں، ان کی گرفتاری نہ صرف واشنگٹن بلکہ بھارت کے لیے بھی ایک بڑا سفارتی دھچکا قرار دی جا رہی ہے۔

سفارتی ماہرین کے مطابق ٹیلِس طویل عرصے سے واشنگٹن میں بھارت نواز پالیسی کے معماروں میں شامل رہے ہیں۔

ایشلے جے ٹیلِس بھارتی شہر ممبئی میں پیدا ہوئے، انہوں نے شکاگو یونیورسٹی سے پی ایچ ڈی کی اور بعد ازاں امریکی شہریت حاصل کی، وہ نیشنل سیکیورٹی کونسل اور محکمہ خارجہ میں اعلیٰ عہدوں پر فائز رہے۔

ایف بی آئی کے مطابق تلاشی کے دوران ٹیلِس کے گھر سے ایک ہزار سے زائد صفحات پر مشتمل خفیہ دفاعی دستاویزات برآمد ہوئیں جن میں امریکی فضائیہ کے طیاروں کی صلاحیتیں، عسکری حکمتِ عملیاں اور دفاعی منصوبے شامل ہیں۔

رائٹرز کے مطابق نگرانی کی ویڈیوز میں انہیں محکمہ دفاع اور محکمہ خارجہ کی عمارتوں سے فائلیں پرنٹ کرتے اور چھپا کر لے جاتے ہوئے دکھایا گیا۔

امریکی اداروں کا کہنا ہے کہ ٹیلِس چینی حکام سے متعدد خفیہ ملاقاتوں میں شریک ہوتے رہے جہاں کبھی انہیں لفافے اور کبھی تحفے کے بیگ دیے جاتے تھے۔

تفتیشی رپورٹ کے مطابق اب تک یہ ثابت نہیں ہوا کہ ٹیلِس نے کوئی خفیہ معلومات منتقل کیں، تاہم خفیہ معلومات کی غیر مجاز تحویل ایک سنگین جرم ہے، اگر الزام ثابت ہوا تو انہیں دس سال قید اور بھاری جرمانے کی سزا ہو سکتی ہے۔

امریکی اٹارنی لنڈسے ہالیگن نے کہا کہ “ہم امریکی عوام کو ہر قسم کے خطرات سے محفوظ رکھنے کے لیے پرعزم ہیں۔”

ٹیلِس کی گرفتاری سے بھارت-امریکہ تھنک ٹینک حلقے بھی سکتے میں ہیں، جہاں وہ برسوں سے بھارت، امریکہ تعلقات پر ایک کلیدی آواز سمجھے جاتے تھے۔

ماہرین کا کہنا ہے کہ یہ کیس امریکی نظام کے لیے خطرے کی گھنٹی ہے، جہاں غیر ملکی نژاد ماہرین کو حساس معلومات تک رسائی حاصل ہے۔

یہ واقعہ ایسے وقت پر پیش آیا ہے جب امریکہ اور بھارت کے تعلقات پہلے ہی کشیدگی کا شکار ہیں، سفارتی ذرائع کے مطابق امریکہ نے بھارت پر روسی تیل کی خریداری اور ماسکو کے ساتھ بڑھتے معاشی تعلقات پر پہلے ہی عدم اعتماد کا اظہار کیا تھا۔

واشنگٹن کا مؤقف ہے کہ بھارت نے یوکرین جنگ کے دوران روس سے سستا تیل خرید کر امریکی پابندیوں کو عملی طور پر کمزور کیا۔

امریکہ میں اس وقت کئی بھارتی نژاد اعلیٰ عہدیدار اہم ذمہ داریاں نبھا رہے ہیں جن میں کملا ہیرس (Deputy President USA)، رچرڈ ورما (Deputy Secretary of State for Management and Resources) اور نیشا بسوال (Deputy CEO, U.S. International Development Finance Corporation) شامل ہیں۔

قانونی ماہرین کا کہنا ہے کہ اگر یہ تاثر پیدا ہوا کہ بھارتی نژاد امریکی مشیر حساس معاملات میں قابلِ اعتماد نہیں، تو مستقبل میں امریکی پالیسی اداروں میں غیر ملکی پس منظر رکھنے والے ماہرین کے لیے دروازے محدود ہو سکتے ہیں۔

واضح رہے کہ بھارتی شہری پہلے ہی امریکن ویزا پابندیوں کا سامنا کر رہے ہیں، اور یہ تازہ اسکینڈل بھارتی نژاد امریکیوں کی پریشانیوں میں مزید اضافہ کر سکتا ہے۔