سعودی عرب میں ملازمت کرنے والوں کیلئے بڑی خوشخبری آگئی

سعودی حکومت نے گھریلو ملازمین کے حقوق کے تحفظ کے لیے بڑا فیصلہ کر لیا۔

اب مملکت میں کسی بھی گھریلو ملازم سے بھرتی، ورک پرمٹ یا پیشے کی تبدیلی کے نام پر کوئی فیس نہیں لی جا سکے گی۔ سعودی سرکاری خبر رساں ادارے کے مطابق اس نئے اقدام کا مقصد گھریلو ملازمین کا استحصال روکنا ہے۔

 وزارت افرادی قوت نے واضح کیا ہے کہ جو بھی آجر اس قانون کی خلاف ورزی کرے گا، اس پر بیس ہزار ریال جرمانہ عائد کیا جائے گا اور تین سال تک اسے کسی بھی گھریلو ملازم کو رکھنے کی اجازت نہیں ہوگی۔

یہ فیصلہ ان غیر ملکی ورکرز کے لیے خوش آئند ہے جو طویل عرصے سے کفیلوں کے سخت رویوں اور مالی بوجھ کا سامنا کر رہے تھے۔

غیر ملکیوں کے لیے مستقل رہائش کا نیا موقع

دوسری جانب سعودی حکومت نے غیر ملکیوں کے لیے پریمیئم رہائش اسکیم کے تحت اہم اپ ڈیٹ جاری کیا ہے۔ اب غیر ملکی افراد مملکت میں بغیر کفیل کے مستقل رہائش حاصل کر سکتے ہیں۔

پریمیئم رہائش اسکیم دو اقسام پر مشتمل ہے:

پائیدار رہائش (Permanent Residency): اس کے لیے ایک مرتبہ 800,000 سعودی ریال (تقریباً 2 لاکھ 13 ہزار امریکی ڈالر) ادا کرنا ہوں گے۔ اس کے بعد تاحیات رہائش کی سہولت حاصل ہوگی۔

قابلِ تجدید رہائش (Renewable Residency): اس کی سالانہ فیس 100,000 سعودی ریال (تقریباً 26,700 امریکی ڈالر) ہے۔

اسکیم کے تحت حاصل ہونے والی سہولتیں

اس اسکیم سے فائدہ اٹھانے والوں کو کئی شہری سہولیات حاصل ہوں گی، جن میں شامل ہیں:

بغیر ویزا ملک میں آزادانہ آمد و رفت

اہلیہ اور بچوں کی کفالت

کاروبار کرنے کی آزادی

جائیداد خریدنے کی اجازت (سوائے مکہ، مدینہ اور سرحدی علاقوں کے)

بینکنگ، تعلیمی اور صحت کی سہولیات تک رسائی

بیرون ملک رقم منتقل کرنے کی سہولت

تاہم یہ رہائشی سعودی شہریت یا ووٹنگ کے حق کے اہل نہیں ہوں گے۔

یہ اقدام سعودی عرب کے وژن 2030 کا حصہ ہے جس کا مقصد مملکت کو عالمی سرمایہ کاری، سیاحت اور جدید معاشی ماڈلز کے لیے پرکشش بنانا ہے۔