دنیا خطرے میں؟ بل گیٹس کی پیشگوئی نے سب کو چونکا دیا

مائیکروسافٹ کے بانی اور امریکی ارب پتی بل گیٹس نے خبردار کیا ہے کہ دنیا اس وقت "انتہائی نازک اور خطرناک موڑ” پر کھڑی ہے۔ ان کا کہنا ہے کہ اگر فوری اور سنجیدہ اقدامات نہ کیے گئے تو "انسانیت تباہی کے دہانے تک پہنچ سکتی ہے”۔

فرانسیسی اخبار L’Express کو دیے گئے ایک انٹرویو میں بل گیٹس نے عالمی حالات پر اپنی تشویش کا اظہار کیا۔ ان کا کہنا تھا کہ آنے والے 20 سال انسانیت کے مستقبل کے لیے فیصلہ کن ثابت ہوں گے۔ کیونکہ عالمی تعاون کا ڈھانچہ ٹوٹ پھوٹ کا شکار ہے، قوم پرستی بڑھ رہی ہے اور ترقیاتی فنڈز میں کمی ہو رہی ہے۔

بل گیٹس نے کہا کہ امیر ممالک اپنے اندرونی مسائل میں اس قدر الجھے ہوئے ہیں کہ وہ عالمی چیلنجز کو نظر انداز کر رہے ہیں، جبکہ غریب ممالک ماحولیاتی تبدیلی، غذائی قلت اور صحت کے سنگین بحرانوں کا شکار ہیں۔ گیٹس کے مطابق سال 2023 میں عالمی ترقیاتی امداد میں تقریباً پانچ فیصد کی کمی آئی ہے، حالانکہ ضرورت اس کے برعکس بڑھ چکی ہے۔

انہوں نے کہا کہ "اندرونی مفادات پر توجہ دینے کا رجحان پہلے کبھی اتنا طاقت ور نہیں تھا”، جس کے نتیجے میں عالمی سطح پر ذمہ داریوں کا احساس کمزور پڑ رہا ہے۔ عالمی عدم مساوات اب ایک خطرناک حد تک جڑ پکڑ چکی ہے۔

تاہم بل گیٹس نے بچوں کی صحت میں ہونے والی بہتری کو ایک امید کی کرن قرار دیا۔ ان کے مطابق 1990 میں ہر سال 1 کروڑ 20 لاکھ سے زیادہ بچے پانچ سال کی عمر سے پہلے فوت ہو جاتے تھے، لیکن 2021 تک یہ تعداد گھٹ کر 50 لاکھ ہو گئی۔ اگر صحت کے نظام میں سرمایہ کاری کا سلسلہ جاری رہا تو یہ شرح مزید کم ہو کر 20 لاکھ سالانہ تک آ سکتی ہے۔