کویتی شہریت حاصل کرنے کے خواہشمند افراد کیلئے اہم خبر آگئی

کویت نے ایک غیر معمولی قدم اٹھاتے ہوئے 21 افراد کی کویتی شہریت منسوخ کرنے کا اعلان کیا ہے۔ یہ فیصلہ ایسے افراد کے خلاف کیا گیا ہے جنہوں نے غیر قانونی طور پر شہریت حاصل کی تھی یا جن پر انحصار کرکے شہریت لی گئی تھی۔

غیر ملکی ذرائع کے مطابق کویت کے حکام نے تین مختلف حکم ناموں کے ذریعے شہریت کی منسوخی کا فیصلہ کیا۔ پہلے حکم نامے میں تین افراد کی شہریت منسوخ کی گئی ہے اور ان افراد کی بھی شہریت واپس لے لی گئی ہے جن پر انحصار کرکے انہوں نے شہریت حاصل کی تھی۔

 دوسرے حکم نامے میں ایک شخص کی شہریت منسوخ کرنے کے ساتھ ساتھ اس کے زیر کفالت افراد کی شہریت بھی واپس لے لی گئی ہے۔ تیسرا حکم نامہ 17 افراد کی شہریت کی منسوخی سے متعلق تھا۔

دوسری جانب کویت میونسپلٹی نے عوام کی سہولت کے لیے ایک نئی ایپلیکیشن متعارف کرائی ہے۔ اس ایپ کا نام ’’بلادیہ 139‘‘ ہے، جس کا مقصد عوام کے ساتھ براہ راست رابطے کو ممکن بنانا ہے۔ اس ایپ کے ذریعے شہری اپنی شکایات اور مسائل کو براہ راست حکام تک پہنچا سکتے ہیں۔ ایپ کے ذریعے حکام کو شکایات کا جواب دینا اور مسائل کو مؤثر طریقے سے حل کرنا آسان ہو گا۔

کویت میونسپلٹی کے تعلقات عامہ کے ڈائریکٹر محمد السندن نے اس ایپ کے فوائد پر بات کرتے ہوئے کہا کہ اس ایپ کا مقصد میونسپل سروسز کو مزید ہموار بنانا اور شہریوں کی شکایات کا فوری حل فراہم کرنا ہے۔ شکایات کو ان کی شدت کے مطابق 4 سے 72 گھنٹوں کے اندر حل کیا جاتا ہے۔ صارفین ایپ پر خلاف ورزی کی جگہ کی تصاویر اپ لوڈ کرکے اپنی شکایات درج کرا سکتے ہیں۔