مودی حکومت عوامی پیسہ اڈانی گروپ کو منتقل کرنے میں مصروف، واشنگٹن پوسٹ کی تہلکہ خیز رپورٹ

امریکی جریدے واشنگٹن پوسٹ نے بھارتی وزیرِ اعظم نریندر مودی اور اڈانی گروپ کے گٹھ جوڑ کو بے نقاب کرتے ہوئے دعویٰ کیا ہے کہ مودی حکومت عوامی پیسہ مخصوص سرمایہ داروں، خصوصاً اڈانی گروپ کو منتقل کر رہی ہے۔

رپورٹ کے مطابق بھارتی حکام نے 3.9 ارب ڈالر کی رقم اڈانی کمپنیوں کو منتقل کی، جبکہ عوامی انشورنس کمپنی ایل آئی سی کے فنڈز بھی اڈانی گروپ کے بانڈز میں لگائے گئے۔

واشنگٹن پوسٹ نے انکشاف کیا کہ اڈانی بانڈز کا پورا اجرا صرف ایل آئی سی نے خریدا، جو عوامی سرمایہ کے غلط استعمال کی واضح مثال ہے، مودی حکومت نے قرضوں کے بوجھ تلے دبے اڈانی گروپ کو حکومتی سرمایہ کاری کے ذریعے سہارا دیا۔

امریکی جریدے نے لکھا کہ "شائننگ انڈیا” کا نعرہ صرف اڈانی اور امبانی جیسے سرمایہ داروں کے لیے مخصوص ہے، جبکہ بھارتی عوام قرض، مہنگائی اور بیروزگاری کے شکنجے میں جکڑے ہوئے ہیں۔

رپورٹ کے مطابق مودی حکومت میں اڈانی گروپ کا اثر و رسوخ گہرا ہے، اور اس گٹھ جوڑ نے بھارت کے معاشی ڈھانچے کو چند سرمایہ دار خاندانوں تک محدود کر دیا ہے۔

امریکی محکمہ انصاف اور ہنڈن برگ رپورٹ دونوں نے اڈانی گروپ پر اربوں ڈالر کی مالی بے ضابطگیوں، دھوکا دہی اور شیئر ہیرا پھیری کے الزامات عائد کیے ہیں۔

تجزیہ کاروں کا کہنا ہے کہ مودی حکومت کا معاشی ماڈل دراصل چند قریبی سرمایہ داروں کے مفادات کا تحفظ کرتا ہے، جبکہ عام بھارتی شہری مالی دباؤ، بے روزگاری اور استحصال کا شکار ہے۔