امریکی کی مسلط کردہ مرضی ہمیں قبول نہیں، ایرانی وزیر خارجہ عباس عراقچی

ایران نےواضح بیان دیتے ہوئے کہا ہے کہ امریکا اپنی مرضی مسلط کرنا چاہتا ہے ہم اسے قبول نہیں کرسکتے۔

ایرانی خبر رساں ادارے مہر ایجنسی کی رپورٹ کے مطابق ایرانی وزیر خارجہ سید عباس عراقچی نے بیان دیتے ہوئے کہا ہے کہ ایران کا ایٹمی پروگرام مکمل طور پر پرامن ہے اور بین الاقوامی قوانین کے دائرے میں ہے۔

ان کا کہنا تھا کہ ایران نے کبھی بھی ایٹمی ہتھیار بنانے کی کوشش نہیں کی اور عالمی رپورٹس بھی اس کی تصدیق کرتی آئی ہیں۔ ایران امریکا سے مذاکرات کیلئے تیار ہے مگر کسی دباؤ میں نہیں  آئے گا۔

ایران امریکا تعلقات پر بیان میں ان کا کہنا تھا کہ جب تک امریکا اپنی بالادستی کی سوچ سے علیحدہ نہیں ہوتا ایران اپنی آزادی کی پالیسی پر قائم رہےگا اور دونوں ممالک کے درمیان مسائل حل نہیں ہوں گے پھر بھی ہم سمجھتے ہیں کہ ان اختلافات کو سنبھالا جاسکتا ہے۔

عباس عراقچی کا مزید کہنا تھا کہ ہر قیمت پر لڑائی ضروری نہیں ہمارے اختلافات بنیادی طور پر امریکا کی بالادستی کی سوچ سے منسلک ہیں۔ اگر امریکا اپنا رویہ بدل لے تو بات چیت ممکن ہے۔

انھوں نے ایران اور امریکا کے درمیان جوہری مذاکرات کی مثال دیتے ہوئے کہا کہ جب امریکا نے عزت سے بات کی، ہم نے بھی مثبت جواب دیا مذاکرات کیے، معاہدہ کیا اور اس پر عمل بھی کیا۔ لیکن بعد میں امریکا نے معاہدے سے نکل کر ہمیں دھوکہ دیا اس لیے ہم امریکا پر اعتماد نہیں کرتے۔

ایرانی وزیرخارجہ کا کہنا تھا کہ رواں سال بھی مذاکرات ہوئے لیکن دوران مذاکرات ہم پر حملہ کیا گیا، امریکا نے اس حملے کی حمایت کی اور بعد میں خود بھی حملے میں شامل ہوگیا، نیویارک میں مذاکرات کا موقع تھا، لیکن ان کی شرائط بالکل غیر منطقی تھیں، وہ چاہتے تھے کہ ایران اپنا سارا یورینیم دے دے، اور بدلے میں صرف چھ ماہ کی پابندیوں میں نرمی ہو، کوئی عقل مند ایسا مطالبہ قبول نہیں کرے گا۔

انھوں نے کہا کہ ایران کو امریکا کے ساتھ کبھی کوئی مثبت تجربہ نہیں ملا، حالانکہ ہم نے ہر بار دیانت داری سے بات کی اور سمجھوتے کی کوشش کی، اب ہم امریکا پر اعتماد نہیں کرتے اور نہ ہی کریں گے۔