معرکہ حق میں شرمناک شکست کے بعد بھارت کی پاکستان کے خلاف ایک اور مذموم سازش ناکام

بھارت کی پاکستان مخالف ایک اور مذموم سازش ناکامی سے دوچار ہوگئی، “معرکۂ حق” میں عبرتناک شکست کے بعد بھارت اب جھوٹے پروپیگنڈے اور بے بنیاد الزامات کا سہارا لینے لگا ہے۔

بھارتی میڈیا نے سابق سی آئی اے افسر جان کیریاکو کی ایک ذاتی اور غیر مصدقہ رائے کو بنیاد بنا کر پاکستان کے خلاف جھوٹی مہم شروع کر دی، بھارتی جریدوں اکنامک ٹائمز، ٹائمز آف انڈیا اور لوکمت ٹائمز نے مبینہ طور پر جان کیریاکو کے فرضی بیانات کو توڑ مروڑ کر پیش کرتے ہوئے پاکستان کے ایٹمی اثاثوں سے متعلق من گھڑت دعوے شائع کیے۔

بھارتی میڈیا نے یہ دعویٰ کیا کہ پاکستان کے ایٹمی ہتھیار ماضی میں امریکی پینٹاگون کے کنٹرول میں تھے اور یہ کہ روایتی جنگ میں پاکستان بھارت کا مقابلہ نہیں کر سکتا۔
وزارتِ اطلاعات و نشریات پاکستان نے ان جھوٹے اور شرمناک دعووں کو مسترد کرتے ہوئے کہا کہ بھارتی مودی میڈیا اپنے عوام کو گمراہ کرنے کے لیے افسانوی کہانیاں گھڑ رہا ہے۔

وزارت کے مصدقہ ذرائع کے مطابق سابق سی آئی اے افسر کے بیانات کا کوئی سرکاری ریکارڈ، ثبوت یا انٹیلی جنس بنیاد موجود نہیں۔

پاکستانی حکام کا کہنا ہے کہ جسے بھارت "ڈی کلاسیفائیڈ انٹیلی جنس” قرار دے رہا ہے، وہ دراصل “بالی وڈ طرز کی فرضی کہانی” کے سوا کچھ نہیں۔

ذرائع نے واضح کیا کہ جان کیریاکو ریٹائرمنٹ کے بعد سے متنازع بیانات دینے کے باعث اپنی ساکھ کھو چکا ہے، اور اس کے تبصروں کو کسی سرکاری حیثیت کا درجہ نہیں حاصل۔

ترجمان وزارتِ اطلاعات نے کہا کہ بھارت دراصل “آپریشن سندور” میں دفاعی محاذ پر پاکستان کے ہاتھوں عبرتناک شکست کے بعد اپنی ناکامی چھپانے کی کوشش کر رہا ہے۔
پاکستانی حکام کے مطابق، نیشنل کمانڈ اتھارٹی (NCA) ہمیشہ سے ایٹمی اثاثوں پر مکمل اور محفوظ کنٹرول رکھتی ہے، جس پر کسی بیرونی ادارے یا ملک کا کوئی اختیار نہیں۔

ترجمان نے کہا کہ بھارت کا جھوٹا پروپیگنڈا اور گودی میڈیا کے ہتھکنڈے ایک بار پھر عالمی برادری کے سامنے بے نقاب ہو گئے ہیں۔