سعودی عرب سے پاکستانیوں کیلئے بڑی خوشخبری آگئی

پاکستان اور سعودی عرب کے درمیان اقتصادی تعلقات مزید مستحکم ہو گئے ہیں۔

 سعودی عرب رواں مالی سال میں پاکستان کو ایک ارب ڈالر کی آئل فیسیلٹی فراہم کرے گا۔ اس کے ساتھ ہی سعودی عرب نے 5 ارب ڈالر کے ڈیپازٹس رول اوور کرنے کا بھی فیصلہ کیا ہے، جو پاکستان کی مالی صورتحال میں اہم معاون ثابت ہوں گے۔

وزارت خزانہ کے حکام کے مطابق سعودی عرب کی جانب سے فراہم کی جانے والی آئل فیسیلٹی کا حجم 290 ارب روپے کے مساوی ہوگا۔ اس فیسیلٹی کے تحت پاکستان کو سعودی عرب سے ماہانہ بنیادوں پر 10 کروڑ ڈالر تک کی آئل فیسیلٹی مل رہی ہے۔

یہ سہولت پاکستانی کرنسی میں ماہانہ 28 ارب 37 کروڑ روپے کے برابر ہے۔ رواں مالی سال کے پہلے تین ماہ میں سعودی عرب نے پاکستان کو 85 ارب روپے سے زائد کی آئل فیسیلٹی فراہم کی، جس کی مالیت تقریباً 30 کروڑ ڈالر ہے۔

اس کے علاوہ، سعودی عرب پاکستان کو 5 ارب ڈالر کے ٹائم ڈیپازٹس بھی فراہم کیے ہوئے ہیں۔ ان ڈیپازٹس پر سعودی عرب 4 فیصد شرح سود وصول کرتا ہے۔ سعودی عرب ہر سال ان فنڈز کی ادائیگی کو رول اوور کرتا ہے، جس سے پاکستان کو مالی امداد ملتی رہتی ہے۔ یہ ڈیپازٹس پاکستان کے بجٹ سپورٹ کے لیے دیے گئے ہیں اور ان کی مجموعی قیمت 1450 ارب روپے کے قریب ہے۔

سعودی عرب کے ان مالی اقدامات سے پاکستان کی اقتصادی صورتحال کو استحکام ملے گا، کیونکہ یہ قرضے اور آئل فیسیلٹیز حکومت کے لیے مالی وسائل فراہم کرنے میں مددگار ثابت ہوں گے۔ سعودی عرب کی جانب سے یہ تعاون دونوں ممالک کے تعلقات کو مزید مستحکم کرنے کی طرف ایک اہم قدم ہے۔