ہوا زہر آلود، رپورٹ بالکل صاف، دہلی میں مودی حکومت کا نیا فراڈ بےنقاب

بھارت کی راجدھانی دہلی میں فضائی آلودگی خطرناک حدوں کو چھو گئی، مگر مودی حکومت نے آلودگی کم کرنے کے بجائے “اعداد و شمار کم کرنے” کی چال چل دی۔

بھارتی اخبار دی انڈین ایکسپریس نے انکشاف کیا ہے کہ دہلی کے آنند وہار آلودگی مانیٹرنگ اسٹیشن پر میونسپل کارپوریشن کے درجنوں ٹینکرز دن رات پانی کا چھڑکاؤ کر رہے ہیں تاکہ سینسر کے گرد گردوغبار کم دکھا کر فضائی آلودگی کی اصل شرح چھپائی جا سکے۔

رپورٹ کے مطابق،صرف 30 میٹر رقبے پر قائم مانیٹرنگ زون میں مسلسل پانی کا چھڑکاؤ کیا جا رہا ہے تاکہ فضائی آلودگی کی سطح مصنوعی طور پر “صاف” دکھائی دے۔
سینسرز کے اردگرد پانی چھڑکنے کی ویڈیوز عام آدمی پارٹی دہلی کے صدر سوربھ بھردواج نے سوشل میڈیا پلیٹ فارم ایکس پر شیئر کیں۔

سوربھ بھردواج نے کہا کہ یہ مودی حکومت کا آلودگی کنٹرول نہیں بلکہ ڈیٹا مینجمنٹ کی مثال ہے۔ بی جے پی حکومت ہر معاملے میں دھوکہ دیتی ہے، اب دہلی کی ہوا کو بھی جھوٹ کے پردے میں چھپایا جا رہا ہے، مودی حکومت آلودگی چھپانے کے لیے پانی اور پٹرول دونوں برباد کر رہی ہے۔

عام آدمی پارٹی کے سینئر رہنما منیش سسوڈیا نے بھی بی جے پی کو آڑے ہاتھوں لیتے ہوئے کہا کہ ہوا کو آلودہ کریں، اعداد و شمار کو کم کریں، پانی سے سچائی چھپائیں، یہی بی جے پی کا آلودگی کنٹرول ماڈل ہے۔

مرکزی آلودگی کنٹرول بورڈ (CPCB) کے ڈیٹا کے مطابق جیسے ہی سہ پہر کے وقت پانی چھڑکاؤ کی سرگرمی کم ہوئی، دہلی میں آلودگی کی شرح 54 فیصد سے زیادہ بڑھ گئی۔

رپورٹ میں کہا گیا ہے کہ دہلی کی فضا اب بھی زہر آلود ہے، مگر مودی حکومت اعداد و شمار کے فراڈ سے عوام کو گمراہ کرنے میں مصروف ہے۔

ماحولیاتی ماہرین نے اسے سرکاری سطح پر ڈیٹا میں ہیرا پھیری کی سنگین مثال قرار دیتے ہوئے کہا ہے کہ دہلی کے شہری بدستور زہریلی ہوا میں سانس لینے پر مجبور ہیں۔