مسلمانوں کیخلاف تعصب، انتہا پسندی اور نفرت انگیزی بی جے پی کا انتخابی ہتھکنڈا

بھارت میں مسلمانوں کے خلاف نفرت اور انتہا پسندی کو انتخابی سیاست کا حصہ بنا دیا گیا ہے۔

بھارتیہ جنتا پارٹی (بی جے پی) ایک بار پھر مذہب کی بنیاد پر ووٹ حاصل کرنے کی کوششوں میں مصروف ہے۔ آر ایس ایس کے انتہا پسند عناصر انتخابی مہم کے دوران ہندوتوا کا زہر پھیلا رہے ہیں تاکہ عوامی رائے کو متاثر کیا جا سکے۔

بھارتی جریدے "دی کوئنٹ” کی رپورٹ نے بی جے پی کے اس تعصبانہ ایجنڈے کو بے نقاب کر دیا ہے۔ رپورٹ کے مطابق بہار سمیت مختلف ریاستوں میں بی جے پی کے رہنما نفرت انگیز تقاریر کر رہے ہیں اور سوشل میڈیا پر مسلمانوں کے خلاف مواد پھیلا رہے ہیں۔

رپورٹ میں بتایا گیا ہے کہ بی جے پی نے اپنی انتخابی مہم میں ایک توہین آمیز گرافک پوسٹ بھی کی، جس میں مسلمانوں کو "گھس بیٹھیے” کہا گیا۔ عام انتخابات کے دوران 373 نفرت انگیز تقاریر ریکارڈ کی گئیں جن میں سے 354 مسلمانوں کے خلاف تھیں۔

بھارتی وزیر داخلہ امیت شاہ نے مسلمانوں کے خلاف "گھس بیٹھیے” جیسے ریمارکس کو درست قرار دیتے ہوئے کہا کہ اگر درانداز مسلمان ہیں تو انہیں بھارت میں رہنے کی اجازت نہیں ہونی چاہیے۔ ان کے بیانات نے بی جے پی کے اصلی چہرے کو واضح کر دیا۔

بی جے پی رہنما گری راج سنگھ نے بھی مذہبی منافرت کو بڑھاوا دیتے ہوئے کہا کہ "احسان نہ ماننے والے غدار نمک حرام ہیں، اور مجھے ایسے لوگوں کے ووٹ نہیں چاہئیں”۔ اسی طرح اشوک کمار یادو نے مسلمانوں کو مخاطب کرتے ہوئے کہا کہ "اگر تمہیں مودی سے نفرت ہے تو مفت راشن، سلنڈر اور سڑکیں استعمال نہ کرو، دریا تیر کر پار کرو۔”

اتر پردیش کے وزیراعلیٰ یوگی آدتیہ ناتھ نے بھی "ترقی بمقابلہ برقعہ” کے نام سے نئی مہم شروع کر کے مسلم مخالف سیاست کو مزید بڑھا دیا ہے۔

اپوزیشن جماعتوں نے بی جے پی کی اس نفرت انگیز مہم پر سخت ردعمل ظاہر کیا ہے۔ اپوزیشن رہنما تیواری کے مطابق، بی جے پی ہر الیکشن سے پہلے ہندو مسلم کارڈ کھیلتی ہے تاکہ عوامی مسائل سے توجہ ہٹائی جا سکے۔ ان کا کہنا تھا کہ "یہ وہی لوگ ہیں جو کہتے ہیں کہ بی جے پی کو ووٹ نہ دینے والوں کو پاکستان چلے جانا چاہیے۔”

بھارتی الیکشن کمیشن بھی بی جے پی کے ان اشتعال انگیز بیانات پر خاموش ہے۔ ضابطے کی خلاف ورزی کے باوجود کوئی کارروائی نہیں کی گئی۔

مودی حکومت کے دور میں بھارت میں مذہبی ہم آہنگی بری طرح متاثر ہوئی ہے۔ نفرت، تعصب اور عدم برداشت نے معاشرے کو تقسیم کر دیا ہے، اور مسلمانوں کے لیے زندگی مزید مشکل بنا دی گئی ہے۔